Հակամարտություն Փաշինյանի ու Միքայելյանի միջև…

Սասուն Միքայելյանի հունիսի 10-ի հայտարարությունը, թե Հայաստանի ապագա վարչապետի լավագույն թեկնածուն Սերժ Սարգսյանն է, չտեսնված աժիոտաժ է առաջ բերել նախևառաջ «Ելք»-ի ներսում:  Ինքը՝ Սասուն Միքայելյանն, արդեն հասցրել է անձամբ հերքել իր իսկ հայտարարությունն, իսկ  Ալեն Սիմոնյանն էլ հայտարարել է, թե մեկնաբանությունը թերի է հնչել, ու այդ կարծիքը չի արտացոլում «Ելք»-ի դիրքորոշումը: Մի խոսքով՝ տպավորություն է՝ ասես այս քաղաքական ուժի ներսում աջ ձեռքը չգիտի՝ ինչ է անում ձախը և հակառակը:

Ի՞նչ է իրականում տեղի ունենում ընդդիմադիր այս ուժի ներսում: Անկասկած է, որ այս «թյուրիմածության» հիմքում ընկած է ներքին պայքարը, պայքար, որ ընթանում է Նիկոլ Փաշինյանի ու Սասուն Միքայելյանի միջև: Բանն այն է, որ Փաշինյանը, չհանդիսանալով «Ելք» դաշինքի նախագահ, իրեն ամենաակտիվն է դրսևորում խորհրդարանում՝ կամա-ակամա ստվերելով մյուսներին, ձեռքի հետ էլ որոշակի դրական ազդակներ հղելով վարչապետ Կարապետյանին: Մի խոսքով` իրեն թույլ է տալիս շատ դեպքերում ոչ ստանդարտ գործելակերպ, ինչը, փաստորեն, արժանացել է ոչ միանշանակ գնահատականի:

Միքայելյանը, փորձելով որոշակի շտկումներ մտցնել դաշինքի ներսում, ջանալով ի ցույց դնել այն իրողությունը, որ «Ելք»-ում միայն Փաշինյանը չէ, որ ակտիվ է, ըստ էության որոշել է հանրության հետ անձամբ կիսվել սեփական տեսակետներով: Բայց արի ու տես, որ Միքայելյանն արել է դա այնքան կոպտորեն, որ ամեն բան խառնել է իրար. դաշինքի ներքին խոհանոցն ու հաշվարկները, պլաններն ու ծրագրերը ակամա քողազերծվել են, ու  այդպիսով  «Ելք»-ը հայտնվել է խիստ անհարմար իրավիճակում: Ու հիմա, փաստորեն, այդ քաղաքական ուժը ստիպված է ամբողջ թիմով միաբերան հերքել Միքայելյանի արտահայտած մտքերն ու անել դա առաջին հերթին հենց Սասուն Միքայելյանի շուրթերով:

Նկատենք, որ Սասուն Միքայելյանի՝ նման տհաճ պատմության մեջ հայտնվելու փաստը լիովին ձեռնտու է հենց Փաշինյանին. նրան պատկանող armtimes.com-ի ակտիվությունն այս հարցում, խիստ օպերատիվ արձագանքն ու Սասուն Միքայելյանի անձի շուրջ դրսևորած հետաքրքրասիրությունը չէին կարող տեղի ուենալ առանց Փաշինյանի համաձայնության: Փաշինյանը, փաստացի, աջակցել է Սասուն Միքայելյանի  շուրջ ներկայում ստեղծված  տհաճ իրավիճակին. ներքին մրցակցություն է, իսկ պայքարում, ինչպես հայտնի է, հաճախ ընդունելի են բոլոր միջոցներն ու մեթոդները:

Թե ինչ զարգացում կունենան դեպքերը, պարզ կլինի, թերևս, ապագայում, սակայն այն, որ «Ելք»-ի ներսում  միասնականության մասին խոսելն այլևս անիմաստ է, անհերքելի է. քիչ-քիչ պառակտվում են:

Դավիթ ԲԱԲԱՆՈՎ