«Սասնա Ծռեր»-ի անդամներից մեկին տեղափոխեցին հիվանդանոց

«Սասնա Ծռեր»-ի գործով դատական նիստին այսօր՝ հուլիսի 12-ին, դատավոր Արտուշ Գաբրիելյանը հայտնեց, որ շտապօգնության բրիգադը հրավիրվել է Ավան և Նոր Նորք վարչական շրջանների ընդհանուր իրավասության դատարան, քանի որ վատացել է ամբաստանյալ Խաչատուր Գիշյանի ինքնազգացողությունը:

«Բժիշկը զննել է Խաչատուր Գիշյանին և ասել, որ վիրահատությունից հետո տասը օր շարունակ նշանակված դեղորայքը չի ընդունել, որի հետևանքով նրա մոտ առողջական խնդիրներ են առաջացել: Ամբաստանյալը ստացիոնար բուժման կարիք ունի և տեղափոխվել է Երևանի «Սուրբ Գրիգոր Լուսավորիչ» բժշկական կենտրոն»,- նշեց դատավորը:

Արտուշ Գաբրիելյանը հայտարարեց, որ ամբաստանյալի բացակայության պայմաններում նիստը չի կարող շարունակվել:

Դատական նիստը հետաձգվեց: Հաջորդ նիստը տեղի կունենա հուլիսի 19-ին:

Հիշեցնենք՝ «Սասնա ծռեր» կոչվող զինված խումբը անցած տարվա հուլիսի 17-ին գրավել և երկու շաբաթ վերահսկողության տակ էր պահել Ոստիկանության պարեկապահակետային գնդի (ՊՊԾ) տարածքը: Այդ ընթացքում զոհվել է երեք ոստիկան: Հուլիսի 31-ին խմբի անդամները հանձնվեցին իրավապահներին:

Ըստ մեղադրանքի, «Սասնա ծռերի» այդ դատավարության 14 անդամները կազմակերպված խմբի կազմում ապօրինի պահվող զենքի գործադրմամբ զավթել են ոստիկանության շենքը, այնտեղ պատանդ պահել ոստիկանության աշխատակիցներին, շտապ բուժօգնության աշխատակիցներին, գույք են ոչնչացրել: