Ադրբեջանը 2014-ին պատրաստվում է պատերազմի. Ռիչարդ Կիրակոսյան

Հարձակումները տագնապալի են, բայց դա չի նշանակում որ նոր պատերազմ է սկսվելու: Այս մասին այսօր լրագրողների հետ հանդիպման ժամանակ հայտարարեց քաղաքագետ Ռիչարդ Կիրակոսյանը:

«Ադրբեջանի մեսիջն ուղված է ոչ միայն Հայաստանին ու Ղարաբաղին, այլ նաև արևմուտքին: Սա է պատճառը, որ այս մեսիջն օգտագործվեց որպես գործոն՝ փչացնելու Քլինթոնի այցը տարածաշրջան»,- նշեց Կիրակոսյանը:

Նրա կարծիքով՝ հարձակում գործելով Հայաստանի տարածքի վրա, Ադրբեջանը փորձում էր Հայաստանին դրդել պատասխան գործողությունների: Նման քայլի գնալը Կիրակոսյանը պայմանավորում է նաև նրանով, որ Ադրբեջանը փորձում է բարձրացնել լեգիտիմության աստիճանը: Բացի այդ, ըստ քաղաքագետի, Ադրբեջանը ցանկանում է ցույց տալ, որ ռազմական առումով ուժեղանում է ու նոր զենքեր է գնում:

«Նախորդ շաբաթ Իսրայելը հայտարարեց Ադրբեջանի հետ երկորդ խոշոր ռազմական պայմանագրի մասին: Նրանք պատրաստվում են պատերազմի 2014 թվականին. դա կապված է զինադադարի պայմանագրի կնքման 20-ամյակի, նավթային պաշարների սպառման ու Սոչիում կայանալիք օլիմպիական խաղերի հետ»,- կարծիք հայտնեց Կիրակոսյանը:

Ըստ նրա՝ Ադրբեջանը դեռ պատրաստ չէ պատերզմի և եթե պատերազմը հիմա սկսվի, Ադրբեջանը կպարտվի, թեև պատրաստվում է հավանական պատերազմին: