ԵՄ արտաքին հարաբերությունների գերագույն հանձնակատարը Ադրբեջանին և Հայաստանին զսպվածության կոչ է արել

Եվրոպական միության արտաքին հարաբերությունների գերագույն հանձնակատար Քեթրին Էշթոնը Ադրբեջանին և Հայաստանին զսպվածության կոչ է արել հարգել հրադադարի ռեժիմը և զսպվածություն դրսևորել ինչպես հայտարարություններում, այնպես էլ՝ շփման գծում։ Դրանք անհրաժեշտ է հակամարտության գոտում հետագա լարվածությունը կանխելու համար։ Էշթոնն իր մտահոգությունն է հայտնել հունիսի սկզբից շփման գծում հակամարտող կողմերի միջև տեղի ունեցող զինված բախումների առնչությամբ և ցավակցություն հայտնել զոհերի կապակցությամբ։ 

«Ո՛չ ուժի կիրառումը ո՛չ ուժի սպառնալիքը, ո՛չ ստատուս քվոյի պահպանումը չեն նպաստում հակամարտության երկարատև լուծմանը», – նշված է ԵՄ–ի մամլո ծառայության տարածած հաղորդագրությունում։

Եվրոպացի դիվանագետը կարևորել է վերջին իրադարձությունների հետ կապված ԵԱՀԿ–ի ներկայացուցիչների կողմից հետաքննության մեխանիզմների մշակման և դրանց կիրառման անհրաժեշտությունը։ Վերջինս ավելացրել է, որ նմանատիպ միջադեպերը ցույց են տալիս ԼՂ հակամարտության բանակցային գործընթացում առաջընթաց գրանցելու անհրաժեշտությունը։ 

«ԵՄ-ն կոչ է անում Հայաստանին և Ադրբեջանին ակտիվացնել ջանքերը ԵԱՀԿ Մինսկի խմբի շրջանակներում և մադրիդյան սկզբունքների հիման վրա խաղաղության համաձայնագրի կնքման ուղղությամբ», – ասված է հայտարարությունում։