Փոքր պատերազմի զոհերը

Նախորդ շաբաթ ադրբեջանական կողմից հրադադարի ռեժիմը խախատվել է շուրջ 1400 անգամ: Բացի մեծաքանակ խախտումներից, ադրբեջանական բանակի կողմից այս շաբաթվա ընթացքում հայ-ադրբեջանական և ղարաբաղա-ադրբեջանական սահմանագծերում իրականացվել է 4 հետախուզադիվերսիոն գործողություն, որի հետևանքով հայկական կողմը կրեց կորուստներ:

Առաջին դեպքը տեղի է ունեցել ս.թ. հունիսի 4-ին, երբ հայ-ադրբեջանական սահմանի հյուսիսարևելյան հատվածում ադրբեջանական կողմը հերթական անգամ կոպտորեն խախտել էր շփման գծում հաստատված հրադադարի ռեժիմը՝ փորձելով ներթափանցել ՀՀ Տավուշի մարզի Բերդավան և Չինարի գյուղերի ուղղությամբ տեղակայված հայկական հենակետեր: Ադրբեջանական դիվերսիայի արդյունքում զոհվել են ՀՀ ԶՈւ զինծառայողներ Հրաչ Սամվելի Սարգսյանը, Զոհրաբ Խաժակի Բալաբեկյանը և Կարեն Կամոյի Դավթյանը: Կան նաեւ վիրավորներ: Կորուստներ էր կրել նաև ադրբեջանական կողմը:

Մեկ օր հետո ադրբեջանական կողմը կրկին հայկական դիրքեր նեթափանցելու փորձ ձեռնարկեց, բայց այս անգամ թշնամին փորձել էր ներթափանցել ԼՂՀ ՊԲ-ի մարտական դիրքերից մեկը՝ ղարաբաղա-ադրբեջանական հակամարտ զորքերի շփման գծի հարավային հատված (Հորադիզի ուղղությամբ): Փորձը կատարվել էր հունիսի 5-ի լույս 6-ի գիշերը, ժամը 04.15-ի սահմանում:

Ծավալված փոխհրաձգության արդյունքում հակառակորդին հասցվել են նշանակալի կորուստներ: Փոխրհաձգության ընթացքում կորուստներ ունեցավ նաև հայկական կողմը:

Ադրբեջանական դիվերսիոն խմբի վնասազերծման գործողության ժամանակ զոհվել է կրտսեր սերժանտ Վարդան Ռոբերտի Օհանյանը, վիրավորվել են շարքային զինծառայողներ Արայիկ Գեղամի Մավրեյանը և Վոլոդյա Յուրայի Ծատրյանը:

Այս դեպքերից հետո հայկական դիրքեր ներթափանցելու այլ փորձեր Ադրբեջանի կողմից չիրականացվեցին, սակայն ադրբեջանական կողմն ակտիվորեն շարունակում էր խախատել հրադադարի պահպանման ռեժիմը: Միայն հունիսի 6-ին և 7-ին ադրբեջանական զինուժի կողմից տարբեր տրամաչափի հրաձգային զենքերից ՊԲ դիրքերի ուղղությամբ արձակվել են հազարավոր կրակոցներ:

Դիրքային փոխհրաձգությունների արդյունքում ղարաբաղյան կողմը կորուստներ չի ունեցել:

Ադրբեջանական կողմի կրած կորուստների մասին պաշտոնական տեղեկատվություն չկա։ Ըստ նախնական տվյալների՝ կա հինգ զոհ և բազմաթիվ վիրավորներ:

Նշենք նաև, որ հետախուզադիվերսիոն գործողության առաջին փորձն իրականացվել է ԱՄՆ պետքարտուղար Հիլարի Քլինթոնի Հայաստան ժամանելուց ժամեր առաջ:

Ազատուհի Արասխանյան