Թուրքիան և Ռուսաստանը շահերի բախում կունենան. Ռիչարդ Կիրակոսյան

ԱՄՆ պետքարտուղար Հիլարի Քլինթոնի այցը Ադրբեջան խանգարվեց ադրբեջանական հարձակումների ժամանակ։ Նման տեսակետ այսօր լրագրողների հետ հանդիպմանը հայտնեց տարածաշրջանային հետազոտությունների կենտրոնի տնօրեն Ռիչարդ Կիրակոսյանը։

Նա ընդգծեց հատկապես ԱՄՆ պետքարտուղարի այցը Թուրքիա։

«Մենք տեսնում ենք նոր հարթակ թուրք–ամերիկյան հարաբերություններում, որոնք դեռևս լարված են և բարդ»,– ասաց Կիրակոսյանը և հավելեց, որ կան որոշակի բարելավումներ, որոնցից մեկը պայմանավորված է Սիրիայի խնդրով, իսկ մյուսը՝ Իրանի։

«Ինչ վերաբերում է Սիրիային, ապա Թուրքիան ակտիվորեն ապահովում է նրանց զինամթերքով, որը նպաստում է ԱՄՆ–ի շահերին, իսկ Ռոսւաստանը նույն ժամանակ զինամթերքով է ապահովում Ասադի կառավարությանը, որը նշանակում է, որ Թուրքիան և Ռոսաստանը շահերի բախում կունենան»,– ասաց Կիրակոսյանը։

Նրա խոսքերով, թուրք-իսրայելական հարաբերությունները օրհասական են, ինչն ուղղակիորեն ազդեցություն է ունենում թուրք–ամերիկյան հարաբերությունների վրա։ Իսկ այն հանգամանքը, որ Իսրայելը պատրաստվում է հայոց ցեղասպանության վերաբերյալ նոր բանաձև ընդունել, ըստ բանախոսի՝ դա Իսրայելի համար Թուրքիայից վրեժ լուծելու միջոց է, իսկ այս քայլն էլ նշանավորվում է նրանով, որ Իսրայելը զինում է Ադրբեջանին։