Ղարաբաղյան հիմնախնդիրը չի նպաստում տարածաշրջանի անվտանգությանը. Վրաստանի ԱԳՆ

Ղարաբաղյան հիմնախնդիրը չի նպաստում տարածաշրջանի անվտանգությանը: Այդ մասին հայտարարել է Վրաստանի արտգործնախարարի տեղակալ Նինո Կալանդաձեն:

Ըստ նրա՝ տարածաշրջանում անվտանգության հաշվեկշիռը բավականին փխրուն է: Միջազգային հանրությունը դա հիանալի գիտի: «Ես համոզված եմ, որ հիմնախնդրի բոլոր անդամ երկրները գիտակցում են, թե ինչքան բարդ է այդ հարցը, թե ինչ հետեւանք կարող է այն ունենալ տարածաշրջանի համար, թե որքան ցավալի հարց կարող է այն դառնալ, այդ թվում՝ տարածաշրջանում պետությունների զարգացման առումով։ Այդ պատճառով էլ ես համոզված եմ, որ երկու պետություններն էլ իրավիճակի գնահատման մեջ սթափ կլինեն և բոլոր միջոցները կձեռնարկեն անվտանգության ապահովման համար», - հայտարարել է Կալանդաձեն, հաղորդում է NewsGeorgia.ru–ն։

Ըստ նրա՝ այսօրվա փխրուն անվտանգության պայմաններում տարածաշրջանում միշտ կա իրադարձությունների սրացման և ահագնացման տեսական սպառնալիքը, որի նկատմամբ տարածաշրջանում պետք է բացառիկ զգոն լինել։ «Համոզված եմ, որ այդ առումով զգայուն են հիմնախնդրի երկու կողմն էլ», - հայտարարել է Կալանդաձեն և ավելացրել, որ երկու պետությունների հետ էլ Վրաստանն ունի ինտենսիվ կապեր։