Ռուսաստանը ձեռնպահ չի մնա ԼՂ հակամարտության շուրջ ռազմական գործողությունների վերսկսման դեպքում. The New York Times

Ռուսական կործանիչներն ավելացրել են ուսումնական թռիչքների քանակը Հայաստանի օդային տարածքում, որը կապված է ԼՂ հակամարտության շուրջ հայ–ադրբեջանական շփման գծում առկա լարվածության հետ։ Ռուսաստանը հակամարտող կողմերին այդ կերպ փորձում է հասկացնել, որ ռազմական գործողությունների վերսկսման դեպքում չի պատրաստվում ձեռնպահ մնալ։ Այս մասին է գրում The New York Times պարբերականը։

Ռուսական բանակի բարձրաստիճան պաշտոնյա Իգոր Գորբունովը շաբաթ օրը Interfax լրատվական գործակալությանը հայտնել է, որ Հայաստանում տեղակայված ռուսական բազայի կործանիչները 2012–ի սկզբից մոտ 300 ուսումնական թռիչք են իրականացրել և թռիչքների ժամաքանակը 2011–ի համեմատ 20%–ով աճել է, գրում է The New York Times–ը։ 

Ռուսաստանը, Ֆրանսիան և ԱՄՆ–ն՝ ԵԱՀԿ Մինսկի խմբի շրջանակներում բազմիցս կոչ են արել Ադրբեջանին և Հայաստանին՝ հակամարտությունը լուծել միայն խաղաղ ճանապարհով։

Ռուս բարձրաստիճան զինվորականը նշել է, որ ռուսական կործանիչները և անձնակազմը պատրաստ են պատերազմի։

«Հիմնական շեշտը դրվում է կատարողական հմտությունների վրա, թե ինչպես օդաչուները կկարողանան իրական պատերազմի ժամանակ կիրառել խաղաղ պայմաններում ձեռք բերված հմտությունները», – ասել է Գորբունովը։ 

Ռուսաստանի արտաքին գործերի նախարարությունն անցյալ շաբաթ հայտարարություն էր տարածել վերջին օրերին հայ–ադրբեջանական շփման գծում լարված իրավիճակի առնչությամբ։ Հաղորդագրությունում նշված է, որ «անընդունելի են» սահմանային բախումները և ՌԴ ԱԳՆ-ն հակամարտող կողմերին կոչ է անում շարունակել հակամարտությունը խաղաղ ճանապարհով լուծելու ջանքերը։ 

Պարբերականը նաև նշել է, որ ՄԱԿ–ի Անվտանգության խորհրդի ոչ մշտական անդամ համարվող Ադրբեջանը հակամարտությանը միջամտելու ակնկալիքով դիմել է այդ կառույցին, որպեսզի մինչև 2012–ի ավարտը ԵԱՀԿ–ի Մինսկի խմբի միջնորդությամբ հակամարտության կարգավորման ուղղությամբ զգալի առաջընթաց գրանցվի։