ՀՅԴ-ն ինքնախաբեությա՞մբ է զբաղված

Երբ ՀՀԿ-ն և ՀՅԴ-ն կոալիցիոն կառավարություն կազմեցին, որոշում էին կայացրել, որ բոլոր կարևորագույն հարցերը պիտի համատեղ քննության առնվեն ու նույնիսկ այդ նպատակի համար հանձնախմբի պես մի բան էին ձևավորել: Դրան հաջորդող զարգացումները ցույց տվեցին, որ բոլոր դեպքերում՝ Հանրապետականը եզրահանգումների եկավ միանձնյա և այդպես էլ համատեղ որևէ քննարկում տեղի չունեցավ: Պատասխանելով լրագրողների այն հարցին, թե վերջին անգամ ե՞րբ է հանդիպել ՀՀԿ-ՀՅԴ կոալիցիոն խորհուրդը և ի՞նչ հարցեր կան օրակարգում՝ ՀՅԴ խմբակցության քարտուղարն ասաց. «Որոշակի պարբերականությամբ խորհուրդը նիստեր է գումարում, քննարկվում են առկա հարցերը: Եթե լինում են Ազգային ժողովում քննարկվելիք կարևորագույն նախագծեր, համատեղ նիստեր ենք անցկացնում ու միասին փորձում ենք որոշումներ կայացնել, նույանականացում ու համախոհություն ձևավորել: Սովորական աշխատանքային գործընթաց է»:

Հետաքրքիր է՝ ինքը՝ ընկեր Աղվանը, կկարողանա՞ հիշել թեկուզ մեկ կարևորագույն խնդիր, որի լուծման ուղիները փնտրելիս Հանրապետականը հաշվի է նստել կոալիցիոն կրտսեր գործընկերոջ հետ: Թերևս՝ ոչ: Բայց Աղվան Վարդանյանը չի կորցնում իր լավատեսությունը. հարցին՝ այդ խորհուրդը քննարկելո՞ւ է 2018թ.-ի վարչապետի թեկնածուի հարցը, նա պատասխանեց, որ կոալիցիոն համաձայնագրով նախատեսված է, որ վարչապետի թեկնածու առաջադրելու իրավունքը պատկանում է ՀՀԿ-ին, բայց ՀՀԿ-ն խորհրդակցելու է ՀՅԴ-ի հետ՝ թեկնածուի առաջադրման հարցում: Գուցե Վարդանյանը իրականում էլ է նման հույսեր փայփայում, սակայն ավելի հավանական է, որ նա չի կտրվել իրականությունից, պարզապես ցանկանում է բարձրացնել ՀՅԴ-ի կշիռը և ցույց տալ, որ կոալիցիա ասվածը ֆիկցիա չէ: Ինքը՝ Վարդանյանն էլ քաջ գիտակցում է, որ ՀՀԿ-ն ոչ ունեցել է, ոչ էլ ունենալու է ՀՅԴ-ի խորհրդի կամ կարծիքների անհրաժեշտությունը, առավել ևս՝ նման առանցքային հարցում: ՀՀԿ-ն շարունակելու է միանձնյա որոշումներ կայացնել, պարբերաբար կոալիցիոն գործընկերոջը մեսիջներ հղելով և հիշեցնելով՝ ում բարի կամքով են հայտնվել նման բարձր կարգավիճակում:

Ստելլա Խաչատրյան