ԵԱՀԿ Մինսկի խմբում ԵՄ–ի մասնակցությունը նոր խթան կհանդիսանա Ղարաբաղյան խնդրի կարգավորման գործընթացում

«ԵԱՀԿ Մինսկի խմբում Ֆրանսիայի փոխարեն Եվրոպական Միության մասնակցությունը նոր լիցք կհաղորդի Ղարաբաղի բանակցային գործընթացին։ Սակայն դա բարդ պրոցես է և մոտ ապագայի խնդիր չէ»,– այս մասին ասել է վերլուծաբան, Միջազգային ճգնաժամային խմբի  եվրոպական ծրագրերի տնօրեն Սաբինա Ֆրեյզերը։

«Մինսկի խմբի ֆրանսիացի համանախագահին ԵՄ–ի մասնակցությամբ փոխարինելը լավ գաղափար է, հատկապես որ ԵՄ-ն բազմիցս իր պատրաստակամությունն է հայտնել խնդրի խաղաղ կարգավորման գործընթացում իր աջակցությունը ցույց տալու ուղղությամբ»,- ասել է Ֆրեյզերը՝ ադրբեջանական լրատվական գործակալություններից մեկին տված հարցազրույցում։

Ըստ փորձագետի՝ շատ կարեւոր է, որ Եվրոպական խորհրդարանը վերանայի Հարավային Կովկասում իր վարած քաղաքականությունը՝ հատկապես Ղարաբաղյան կոնֆլիկտի կարգավորման գործընթացում. «Բայց ես կասկածում եմ, որ Քեթրին Էշթոնը համաձայնել է այդ դերը ստանձնել։ Քանի որ ԵՄ Բարձր ներկայացուցչությունն իր վրա պատասխանատվություն է կրում ողջ աշխարհում հակամարտությունները կարգավորելու ուղղությամբ և դա խոչընդոտ է ԵՄ–ի համար՝ ամբողջությամբ Ղարաբաղյան հակամարտության գործընթացին նվիրվելու առումով»։

Միեւնույն ժամանակ, փորձագետը նշել է, որ եվրոպական բոլոր երկրներն իրենց պատրաստակամությունն են հայտնել աջակցել ԵՄ-ի մասնակցությանը ԵԱՀԿ Մինսկի խմբի աշխատանքներին և կարևորել են իրենց ինտենսիվ մասնակցությունը, որը կնպաստի խնդրի խաղաղ կարգավորման գործընթացին։ «ԵՄ 27 անդամ երկրները միաձայն իրենց հավանությունն են տվել, ԵԱՀԿ Մինսկի խմբում ԵՄ–ի մասնակցության վերաբերյալ»,– նշել է Ֆրեյզերը։

Միեւնույն ժամանակ Սաբինա Ֆրեյզերը շեշտել է, որ այդ նախաձեռնությունները Եվրոպական խորհրդարանի առաջնահերթություններից չեն, և, ի վերջո, ամեն ինչ կախված է հակամարտող կողմերի դիրքորոշումից, որոնք կորոշեն փոխել կամ չփոխել ձեւաչափը։ «ԵԱՀԿ Մինսկի խմբի ձևաչափը փոխելը բարդ գործընթաց է այն իմաստով, որ համանախագահներից մեկին փոխարինելու է գալու մեկ առանձին կառույց, իսկ դա կախված է Ադրբեջանի եւ Հայաստանի համաձայնությունից»,- ասել է նա։

Հիշեցնենք, որ ԵԱՀԿ Մինսկի խմբի ֆրանսիացի համանախագահի փոխարեն Ղարաբաղյան բանակցային գործընթացում ԵՄ–ի մասնակցության մասին տեղեկությունը հայտնել էր Եվրոպական խորհրդարանում Բուլղարիայի ներկայացուցիչ Քրիստիան Վիգենինը։ Ըստ նրա՝ այս թեմայի շուրջ քննարկումները ԵԽ–ում տեղի են ունեցել վերջերս։ Վիգենինը չի բացառել, որ Մինսկի խմբում ԵՄ ներկայացուցիչը կարող է լինել ԵՄ Արտաքին քաղաքականության և անվտանգության գլխավոր քարտուղար Քեթրին Էշթոնը։