Բաքուն իր պահանջներն է ներկայացնում Մոսկվային

Ադրբեջանը մտադիր է բարձրացնել Ռուսաստանի կողմից շահագործվող ռադիոլոկացիոն կայանի վարձակալության գինը։ «Կոմերսանտ» պարբերականը, հղում անելով ՌԴ Պաշտպանության նախարարության աղբյուրներին, հայտնում է, որ այժմ պաշտոնական Բաքուն Ռուսաստանից պահանջում է տարեկան վճարվող 7 մլն դոլարի փոխարեն՝ 15 մլն դոլար։ Պաշտոնական Մոսկվան կատեգորիկ չի ընդունել Ադրբեջանի պահանջը։

Ստեղծված հարցի հետ կապված Ռուսաստանն ստեղծել է աշխատանքային խումբ՝ ՌԴ Պաշտպանության նախարարության, ԱԳ նախարարության, Առևտրի և արդյունաբերության նախարարության ներկայացուցիչներից կազմված։ Ռուսական կողմն այս հարցի հետ կապված իր առաջարկություններ է ներկայացրել. օրինակ՝ վարձակալված տարածքների մեկ երրորդի չափով նվազեցումը։ Գաբալայի ռադիոլոկացիոն կայանի՝ ռուսական կողմի վարձակալության ժամկետն ավարտվում է 2012 թ.-ի դեկտեմբերին։ ՌԴ պաշտպանության նախարարի մամլո խոսնակ Իրինա Կովալչուկը հայտնել է, որ Ռուսաստանը մտադիր է Գաբալայի կայանի վարձակալության ժամկետը երկարաձգել մինչև 2025 թ.-ը։ Նոյեմբերի 18–ին ՌԴ Պաշտպանության նախարար Վիկտոր Սերդյուկովը հայտարարել էր, որ Ռուսաստանը պլանավորել է ամբողջությամբ վերակառուցել Գաբալայի ռադիոլոկացիոն կայանը։

Հիշեցնենք, որ նոյեմբերի 17–ին՝ Ռուսաստանի և Ադրբեջանի պաշտպանության նախարարների հանդիպման ժամանակ, քննարկվել էր Գաբալայի կայանի հետ կապված մի շարք խնդիրներ։