Մենք մտահոգված ենք Հայաստանի և Ադրբեջանի միջև ընթացող բանակցությունների դանդաղ ընթացքով. Հերման վան Ռոմպեյ

Մենք մտահոգված ենք ԼՂ հակամարտության կարգավորմանն ուղղված Հայաստանի և Ադրբեջանի միջև ընթացող բանակցությունների դանդաղ ընթացքով:
Այդ մասին «Արմենպրես»-ին տված հարցազրույցում ասել է Եվրոպական խորհրդի նախագահ Հերման վան Ռոմպեյը: Նա նշել է, որ մեծ մտահոգությամբ է տեղեկացել վերջերս Հայաստանի և Ադրբեջանի սահմանին և շփման գծում տեղի ունեցած բռնությունների մասին: Խորապես ցավում եմ մարդկային կյանքերի ողբերգական և անհարկի կորուստների համար:

Հերման վան Ռոմպեյն ընդգծել է, որ ռազմական ուժի կիրառումը չի կարող լուծել այս հակամարտությունը:

«ԼՂ հակամարտության միայն խաղաղ կարգավորումը կօժանդակի հարավկովկասյան տարածաշրջանի՝ որպես ավելի կայուն և լիակատար գործող դարպասի վերափոխմանը Եվրոպայի և Ասիայի միջև։ ԵՄ-ն վերահաստատել է իր աջակցությունը ԵԱՀԿ Մինսկի խմբին, սակայն համաձայնության հասնելու պատասխանատվությունը Հայաստանի և Ադրբեջանի ձեռքում է»,– ասել է ԵՄ ղեկավարը։

ԵՄ-ն բազմիցս արտահայտել է իր պատրաստակամությունը՝ նպաստելու վստահության կառուցման միջոցներին, որոնք կարող են օժանդակել ԵԱՀԿ Մինսկի խմբի աշխատանքին: Այս համատեքստում Եվրոպական միությունը պատրաստ է առավել մեծ աջակցություն ցուցաբերել վստահության կառուցման միջոցների և երկու կողմերի բնակչությունների միջև կապերի հաստատմանը՝ քաղաքացիական հասարակության ներգրավման միջոցով: