ԵՄ-ը կարող է հավելյալ աջակցություն ցուցաբերել հակամարտող կողմերի միջև վստահության ձևավորելու հարցում. Հերման վան Ռոմպոյ

Շատ նախագծեր չեն կարող իրագործվել, քանի դեռ տարածաշրջանում բացակայում է կայունությունը: Եվրամիությունը շարունակելու է աջակցել ԼՂ հակամարտության կարգավորմանը։ Այս մասին ԵՄ-ի նախագահ Հերման Վան Ռոմպոյը հայտարարել է Ադրբեջանի լեզուների համալսարանում կայացած հանդիպման ընթացքում, հաղորդում է 1news.az–ը։

Նա նշել է, որ ԵՄ-ը՝ ինչպես նախկինում, այնպես էլ այժմ ցանկանում է առանց որևէ նախապայմանի մուտք ունենալ Լեռնային Ղարաբաղ և սահմանամերձ շրջաններ։

«ԵՄ-ը անհանգստացած է հայ-ադրբեջանական շփման գծում վերջերս տեղի ունեցած միջադեպերի կապակցությամբ և կողմերին կոչ է անում հարգել հրադադարի ռեժիմն ու խուսափել հակամարտության էսկալացիայից: Մենք լիովին աջակցում ենք ԵԱՀԿ Մինսկի խմբի գործունեությանը: Միևնույն ժամանակ, ԵՄ-ը կարող է հավելյալ աջակցություն ցուցաբերել հակամարտող կողմերի միջև վստահության մթնոլորտ ձևավորելու հարցում: Առանց միմյանց վստահելու՝ կողմերը երբեք չեն հասնի խաղաղության։ Խաղաղության հասնելու իրատեսական ճանապարհը Մադրիդյան սկզբունքների հիման վրա բանակցությային գործընթացն է», - հայտարարել է Հերման վան Ռոմպեյը:

Եվրոպայի Խորհրդի նախագահը նշել է, որ հակամարտության կարգավորման համար ժամանակ է անհրաժեշտ:

«Անհնար է տունը կառուցել մեկ օրում, ինչպես նաև անհնար է մեկ օրում լուծել հակամարտությունը կամ կառուցել ժողովրդավարություն: Տանիքին հասնելու համար պետք է աղյուսը աղյուսի հետևից շարելով դնել: Եվրամիությունը շարունակում է աջակցել կողմերին այդ գործում», - ասել է Հերման վան Ռոմպոյը: