Առկա ստատուս-քվոն անընդունելի է. ԵԱՀԿ Գլխավոր քարտուղար

ԵԱՀԿ-ի Գլխավոր քարտուղար Լամբերտո Զաները տարածաշրջանային այցի շրջանակում այցելել է Բաքու։ Ադրբեջանի արտգործանխարար Էլմար Մամեդյարովի հետ կայացած հանդիպումից հետո՝ ճեպազրույցի ընթացքում Լամբերտո Զաները հայտարարել է, որ սա ԵԱՀԿ-ի գլխավոր քարտուղարի կարգավիճակում նրա առաջին այցն է Ադրբեջան։

Այցի ընթացքում նախարարի հետ նրանք քննարկել են տարածաշրջանի վերաբերյալ մի շարք հարցեր՝ մասնավորապես ԼՂ հակամարտության ներկա իրավիճակի վերաբերյալ։ Գլխավոր քարտուղարը հայտարարել է, որ ԼՂ հակամարտության կարգավորման հարցը բարձրացնելու է նաև Հայաստան կատարելիք այցի ընթացքում, հիշեցնելով, որ հուլիսի 10-ին մեկնարկում է ԵԱՀԿ Մինսկի խմբի համանախագահների հերթական տարածաշրջանային այցը:

«Հայ-ադրբեջանական սահմանին գրանցված միջադեպերը լուրջ մտահոգություն են առաջացնում: Դրանք անթույլատրելի են, քանի որ դրանց հետևանքով մարդիկ են զոհվում: Գոյություն ունեցող ստատուս-քվոն անընդունելի է», – հայտարարել է Զաները։ 

Վերջինս նշել է, որ ԵԱՀԿ-ն մի շարք միջոցներ է առաջ քաշել՝ դիպուկահարներին շփման գծից հեռացնելու, վստահության մթնոլորտ ձևավորելու, շփման գծում գրանցված միջադեպերի հետաքննման մեխանիզմներ մշակելու ուղղությամբ:

«Բանակցություններին այլընտրանք չկա: Անհրաժեշտ է հասնել հակամարտության կարգավորմանը: Սակայն չի կարելի այդ լուծումը փաթաթել կողմերի վզին, կողմերն իրենք պետք է գտնեն այն», – ընգծել է ԵԱՀԿ Գլխավոր քարտուղարը։