Մոսկվան դեմ է պատրաստի բանաձևերով լուծմանը. Ս. Նարիշկին

Ռուսաստանը միշտ Հարավային Կովկասում անվտանգության և կայունության հաստատման կողմնակից է եղել։ Այդ մասին Բաքվի Սլավոնական համալսարանում իր ելույթում ասել է Ռուսաստանի Պետդումայի նախագահ Սերգեյ Նարիշկինը:

«Մենք դեմ ենք ԼՂ հակամարտության լուծմանը՝ պատրաստի բանաձևերով: Մենք համոզված ենք, որ այդ խնդիրը կլուծվի, եթե երկու կողմերի շահերը բավարարվեն: Ռուսաստանը պատրաստ է նման համաձայնության երաշխավորը դառնալ, թեև հակամարտության կարգավորման պատասխանատվությունը շարունակում է մնալ Հայաստանի և Ադրբեջանի ժողովուրդների վրա»,- ասել է նա:

Նարիշկինը հիշեցրել է, որ ՌԴ նախկին նախագահ Դմիտրի Մեդվեդեևի նախաձեռնությամբ Ադրբեջանի և Հայաստանի նախագահները հանդիպել են 10 անգամ: «Այդ հանդիպումները չի կարելի բացարձակ անարդյունավետ համարել: Դրանք թույլ են տվել բացահայտել կողմերի դիրքորոշումը՝ հակամարտության լուծման ճանապարհին», – նշել է Նարիշկինը։

Պետդումայի նախագահը մտահոգություն է հայտնել նաև հայ-ադրբեջանական շփման գծում տեղի ունեցած վերջին միջադեպերի կապակցությամբ: «Մենք միշտ ներկայացրել ենք մեր դիրքորոշումը՝ ուժի կիրառման և սպառնալիքի անընդունելիության վերաբերյալ: Ես լավատես եմ և հույս ունեմ, որ այդ հակամարտությունը խաղաղ լուծում կունենա», – ընդգծել է նա։