Վստահ եմ, որ նույն կերպ կհարգեք եւ կգնահատեք իմ իրավահաջորդին. Շիրակի մարզպետը գնում է ԱԺ

Շիրակի մարզպետ Կարեն Սարուխանյանն անդրադարձել է մարզպետի պաշտոնից հեռանալու եւ աշխատանքը Ազգային ժողովում շարունակելու որոշմանը: Դեկտեմբերի 9-ին կայացած խորհրդարանական ընտրությունների արդյունքում նա ընտրվել է պատգամավոր:

«Հարգելի շիրակիցնե՛ր, հաշվի առնելով մարզում վերջին ամիսներին իրականացրած արդյունավետ աշխատանքը եւ մեր քաղաքական թիմի սկզբունքային ձեռագիրը, համատեղ որոշում է կայացվել, եւ ես գործունեությունս շարունակելու եմ Ազգային Ժողովում։ Քաջատեղյակ լինելով մարզի խնդիրներին՝ դրանց լուծումները տեսնում եմ օրենսդրական դաշտում։ Մենք հեղափոխությունից հետո եւ ընտրությունների արդյունքում ճանապարհ ենք հարթել, որ միասնական ջանքերով Նոր Հայաստան կառուցենք։ Սա է պատճառը, որ մեր հետագա աշխատանքը հաջորդ մարզպետի հետ՝ որպես «Քաղաքացիական պայմանագիր» կուսակցության գաղափարների կրող եւ նույն քաղաքական թիմի անդամ, լինելու է կառուցողական ու նպաստավոր մարզի համար։ Վստահ եմ, որ նույն կերպ կհարգեք եւ կգնահատեք իմ իրավահաջորդին։ Հավատացեք, որ Շիրակի մարզի շենացման խնդիրները համատեղ ջանքերով լուծում կստանան»,- ֆեյսբուքի իր էջում գրել է Կարեն Սարուխանյանը։