Ինձ մտահոգում է, որ դուք նսեմացնում և ցածրացնում եք Ազգային ժողովի դերը. Գորգիսյանը՝ Հայրապետյանին

Ազգայի ժողովում քննարկվում է Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի հարցը: Նշենք, որ թեկնածուն «Իմ քայլից» Մխիթար Հայրապետյանն է, ում այս պահին պատգամավորները հարցեր են ուղղում: «Լուսավոր Հայաստան» խմբակցության պատգամավոր Գևորգ Գորգիսյանը հետևյալ հարցն ուղղեց Հայրապետյանին. 

«Ձեր պատասխաններից ելնելով՝ Դուք անընդհատ հղում եք անում կառավարության վրա, բայց շատ կարևոր հանձնաժողով եք պատրաստվում նախագահել և այստեղ շատ կարևոր է լինելու նաև Ձեր մոտեցումը, որովհետև երբ կառավարությունը բերի մի հայեցակարգ կրթության, գիտության, մշակույթի կարևորագույն ոլորտների հետ կապված՝ նաև Ազգային ժողովը պետք է հստակ դիրքորոշում ունենա այդ հարցերի վերաբերյալ և ինչու չէ՝ նախաձեռնի այդ ամենի գեներացիան և ինձ մտահոգում է, որ դուք այդ ամենը թողնում եք կառավարության վրա՝ կրկին նսեմացնելով և ցածրացնելով Ազգային ժողովի դերը: Այս հարցին, խնդրում եմ՝ անդրադարձեք»:  

Հարցին ի պատասխան Հայրապետյանը նշեց, որ բացարձակ չի կիսում նրա մտահոգությունները:

«Ես ափսոսում եմ, որ Ձեզ մոտ իմ խոսքից նման տպավորություն է ստեղծվել, որովհետև ես առաջինն էի 7-րդ գումարման Ազգային ժողովում, ով խոսեց պառլամենտարիզմի՝ որպես ինստիտուտի դերի բարձրացման  և նախկինում առկա այդ գահավիժման դեմն առնելու և որպես գործադիրի վերահսկող ֆունկցիաների լիակատար իրականացման  և ես անգամ այս ամբիոնից սթափեցնողի դեր կատարեցի: Հասկանալի է, որ «Իմ քայլը» դաշինքը ստացել է  հանրության վստահության քվեն, որի քաղաքական թիմից նաև նշանակվել է վարչապետը և նա ձևավորելու է կառավարությունը, այսինքն կառավարությունը հետևողականորեն պետք է իրականացնի այն նախընտրական ծրագիրը, որը մեր քաղաքական թիմը ներկայացրել է հանրության դատին: Այսինքն՝ կառավարության հետևողական այդ գործունեությունը նաև բնականաբար մեր քաղաքական թիմի ներկայացրած  ծրագրի հիման վրա է լինելու»,-ասաց Հայրապետյանը: 

Գորգիսյանը Հայրապետյանից հետաքրքրվեց նաև, թե մշակույթի ոլորտում ինչ տեսլականներ ունի: Հարցին պատասխանելով՝ Հայրապետյանն ասաց. «Իմ քայլը» դաշինքը մշակույթի իր բլոկով ստանձնած պարտավորություններին հետևողականորեն պետք է գնա նաև օրենսդրական դաշտում»: