Նոր զարգացումներ՝ Արամ Հարությունյանի գործով

14 միլիոն ԱՄՆ դոլար կաշառք վերցնելու մեջ մեղադրվող ԱԺ նախկին ՀՀԿ խմբակցության պատգամավոր, նախկինում քաղաքաշինության, այնուհետև բնապահպանության նախարար Արամ Հարությունյանի (Բուլկի Արամ) գործով նոր զարգացումներ են սպասվում։ Հատկապես, որ ավարտվել են նախկին ԱԺ-ի լիազորությունները, նոր խորհրդարան է ձևավորվել, ինչի հետևանքով Հարությունյանն այլևս կորցրել է պատգամավորական անձեռնմխելիությունը և առաջիկայում հավանական է վերջինիս կալանավորումը։

ԼՈւՐԵՐ․com-ի հետ զրույցում Հատուկ քննչական ծառայության մամուլի խոսնակ Մարինա Օհանջանյանը նշեց, որ ՀՔԾ-ն առաջիկայում կանդրադառնա Արամ Հարությունյանին․ «Դրա հետ կապված առաջիկա օրերին, գուցե հենց վաղն էլ տեղեկատվություն տրվի։ Այս պահին որևէ բան ասելը կխանգարի նախաքննությանը»,- փոխանցեց նա։

Թեև մինչ պատգամավորական մանդատից զրկվելը Հարությունյանը չէր կարող կալանավորվել, սակայն երկրից հեռանալը հնարավոր էր կանխել, քանի որ նրա նկատմամբ մեղադրանք կար առաջադրված և քննություն էր ընթանում: Իսկ Արամ Հարությունյանը հեռացել է Հայաստանից, թե ոչ՝ հայտնի չէ։ 

Հիշեցնենք՝ գործարար Սիլվա Համբարձումյանը պնդում էր, որ Արամ Հարությունյանին 14 մլն ԱՄՆ դոլարի կաշառք է տվել հանքերի շահագործման լիցենզիա ստանալու համար։ 6-րդ գումարման Ազգային ժողովի վերջին՝ դեկտեմբերի 4-ի արտահերթ նիստը հենց նրա հարցով էր, սակայն նախկին ԱԺ-ն քվորում չապահովեց ՀՀԿ-ական Արամ Հարությունյանին անձեռնմխելիությունից զրկելու հարցը քննարկելու համար։

Սոնա Հարությունյան