Կոնջորյանի հայտարարությամբ Հայաստանի նոր իշխանությունները արձանագրեցին անփոխարինելի ռեկորդ

ֆեյսբուքյան օգտատեր Իրինա Դանիելյանը գրում է․

ՀՀ ԱԺ «Իմ քայլը» խմբակցության պատգամավոր Հայկ Կոնջորյանը խորհրդարանի նիստում Իրանի իշխանությունների դեմ հնչեցրած հայտարարությունը միանշանակ բացասական արձագանք ունեցավ Հայաստանի լրատվական դաշտում: 
Զերծ մնալով Իրանի իշխանության էության մասին Հայկ Կոնջորյանի տեսակետը քննարկելուց հիշյալ հայտարարության, դրան հաջորդած բացատրության եւ վերջին օրերի զարգացումների մասին անհրաժեշտ եմ համարում կատարել մի քանի արձանագրում:

1) Հայկ Կոնջորյանի հայտարարությամբ Հայաստանի նոր իշխանությունները հայ-իրանական հարաբերությունների վերջին առնվազն 20-ամյա պատմության մեջ արձանագրեցին նոր ու անփոխարինելի մի ռեկորդ: Առաջին անգամ Հայաստանի խորհրդարանի ամբիոնից հնչեց Իրանի դեմ ուղղված հայտարարություն, որն կարծում եմ թե իր նախընթացը չի ունեցել:

2) Հայկ Կոնջորյանի հայտարարությունը համարում եմ Իրանի կապակցությամբ դիրքորոշման մասին Հայաստանում թավշյա հեղափոխության (իշխանափոխության) արդյունքում իշխանության եկած ուժերի ամենաանկեղծ ու համարձակ խոստովանությունը: Հայկ Կոնջորյանի ամբողջական ելույթը (եւ ոչ միայն խնդրահարույց հատվածը) ներկայացնում է Իրանի եւ տարածաշրջանային զարգացումների հետ կապված Հայաստանի նոր իշխանությունների ընդհանուր մտածողությունը:

3) Հայկ Կոնջորյանն ավելի ուշ հայտարարեց, որ իր արտահայտության այդ բաժինը վրիպակ է եղել: Մի կողմ թողած այն հարցը, թե որքանով է թույլատրելի ՀՀ ԱԺ-ի ամբիոնից մեծամասնության խմբակցության անդամի նման կոպիտ վրիպակը, այդուհանդերձ անձամբ հակված չեմ դա վրիպակ համարելու: Դա է վկայում է Կոնջորյանի ելույթի հաջորդ բաժինը, որտեղ նա համեմատության եզրեր անցկացնելով Հայաստանին շրջապատող ավտորիտար ռեժիմների եւ ժողովրդավարական Իսրայելի միջեւ գովեստի խոսքեր է շռայլում վերջինիս հասցեին: 
Անհերքելի փաստ է, որ այսօր տարածաշրջանում ձեւավորվել է իրավիճակ, որտեղ գոյություն ունեն երկու հիմնական ճակատներ: Իրանի եւ նրան ընդդիմացող ԱՄՆ-ի ու Իսրայելի: Հայկ Կոնջորյանի ելույթից ու նաեւ օրեր առաջ Jerusalem Post-ին տված հարցազրույցում Իսրայելի հետ հարաբերությունները ընդլայնելու Հայաստանի ցանկության մասին ՀՀ ԱԳ նախարարի պաշտոնակատար Զոհրաբ Մնացականյանի արտահայտություններից այնպես է հասկացվում, որ Հայաստանի նոր իշխանություններն ընտրել են այն ճակատը, որտեղ գերադասում են տեսնել ապագա Հայաստանը:

«Հրապարակ»-ն օրեր առաջ գրեց, որ հիմնականում ամերիկյան արտաքին քաղաքականությունը ներկայացնող «Ազատության» լրագրողները տեղափոխվում են Հայաստանի իշխանության պաշտոնական խոսափողը համարվող «Հանրային հեռուստաընկերություն», ինչը նույնպես կարող է մեկ այլ ապացույց լինել Հայաստանի իշխանությունների գերադասած ճակատի մասին: 

4) Հայկ Կոնջորյանի ելույթին զուգահեռ ԻԻՀ ԶՈԻ գլխավոր շտաբի պետ գեներալ-մայոր Մոհամմեդ Բաղերին Բաքվում հանդիպեց Ադրբեջանի նախագահ Իլհամ Ալիեւին: «Հայկական ժամանակ»-ը հղում կատարելով ադրբեջանական կայքերի գրեց, հանդիպման ժամանակ Իրանի ԶՈՒ գլխավոր շտաբի պետը հայտարարել է, որ Իրանը ԼՂ-ն համարում է Ադրբեջանի տարածքի մեկ բաժինը եւ պաշտպանում է Ադրբեջանի տարածքային ամբողջականությունը:

Դրան հաջորդեցին մեկնաբանություններ այն մասին, որ դա Իրանի պատասխանն է եղել Հայկ Կոնջորյանի հայտարարությանը: Ավելի ուշ հղում կատարվելով Իրանի պաշտոնական լրատվական գործակալություն՝ ԻՌՆԱ-ի հաղորդմանը հայտարարվեց, որ այդ հանդիպման ընթացքում միայն խոսք է գնացել Ադրբեջանի տարածքային ամբողջականության պահպանման մասին, ինչն Իրանի դիրքորոշումներում նորություն չէ: 
Լավ ճանաչելով իրանցիներին կարող եմ արձանագրել, որ Իրանը Հայկ Կոնջորյանի կամ ընդհանրապես Հայաստանի խորհրդարանի որեւէ պատգամավորի հայտարարությանը չէր պատասխանելու նման բարձրաստիճան պաշտոնատարի մակարդակով: Հավատացած եմ որ Իրանի պատասխանը չի ուշանա եւ կլինի անուղղակի: 
Իսկ ինչ վերաբերում է ԻՌՆԱ-ի լրատվությանը դա չափազանց ամփոփ է եւ բնականաբար չի արտացոլում հանդիպման ժամանակ քննարկված թեմաների եւ հնչեցված մտքերի ամբողջությունը: Ի դեպ, ադրբեջանական կայքերի հրապարակման մասին իրանական կողմը որեւէ հերքում չի կատարել: 

Իսկ ինչ վերաբերում է ԼՂ-ի հակամարտության մասին Իրանի պաշտոնական դիրքորոշմանը թեմային հունվարի 11-ին ադրբեջանական «Թրենդ»-ին տված բացառիկ հարցազրույցում անդրադարձել է Ադրբեջանում Իրանի դեսպան Ջավադ Ջահանգիրզադեն: Բաքվում Իրանի դեսպանը հստակ կերպով կրկնել է հոկտեմբերին Ստամբուլում Իրանի, Ադրբեջանի ու Թուրքիայի ԱԳ նախարարների հանդիպման ամփոփիչ հաղորդագրության մեջ ԼՂ-ի հակամարտության կապակցությամբ տեղ գտած ձեւակերպումները, որը ժամանակին այնքան էլ հայանպաստ չընկալվեցին: