Ո՞վ կլինի մշակույթի կողմի «խնամին»՝ նախարարությունների «ամուսնության» ժամանակ

Համացանցում տեղեկություններ էին տարածվել, թե Բրյուսովի անվան լեզվաբանահասարակագիտական համալսարանի պրոռեկտոր Գրիշա Թամրազյանին եւ մշակույթի փոխնախարար Նազենի Ղարիբյանին, հնարավոր է՝ նոր ստեղծվելիք միասնական նախարարությունում փոխնախարարներ նշանակեն։ 

Պետք է նշենք, որ եթե Գրիշա Թամրազյանը նախկին իշխանությունների օրոք էր նշանակվել, ապա Նազենի Ղարիբյանի դեպքում պատկերն այլ է։

ԼՈՒՐԵՐ.com-ի թղթակցի հետ զրույցում Ղարիբյանը ոչ հերքեց, ոչ էլ հաստատեց տարածված տեղեկությունը․

«Այս պահին ես կատարում եմ մշակույթի նախարարի պարտականությունները, բայց դա չի նշանակում՝ ես պետք է միասնական նախարարությունում փոխնախարար լինեմ: Դա հնարավոր է, բայց դեռ որոշված չէ»,- ասաց մշակույթի փոխնախարարը։

Խոսելով Մշակույթի ևԿրթության և գիտության նախարարությունների միացումից, փոխնախարարը նկատեց, որ անկախ նրանից՝ գործում է Մշակույթի նախարարությունն առանձին, թե՝ ոչ, նախարարության բոլոր գործառույթները պահպանվում են․ «Մենք ունենում ենք այդ ինքնուրույնությունը՝ ի դեմս  այն փոխնախարարի, որը կլինի։ Ամենակարևոր խնդիրը հետևյալն է՝ կա աշխատանք, կան խնդիրներ մշակույթի դաշտում, և այդ խնդիրները պետք է լուծում ստանան։ Մշակույթի ոլորտում եղած խնդիրներն ու աշխատանքները չեն կարող կրճատվել կամ անտեսվել, խնդիրն այլ տեղ է՝ որքան արագությամբ և որքան ճկունությամբ մենք կկարողանանք այս «ամուսնությունը» կազմակերպել և շատ արագ անցնել գործի»։

Այնուամենայնիվ, ըստ Ղարիբյանի՝ անկախ նրանից՝ կլիներ նախարարությունների միացում, թե՝ ոչ, Մշակույթի նախարարությունում փոփոխություններ պետք է լինեին ընտրություններից հետո, քանի որ նախարարությունը գերծանրաբեռնված էր և գերհաստիքային․ «Այս ամենի վերլուծության  արդյունքում, որի համար ունենք հատուկ հրավիրված մասնագետներ, պատկեր է ստեղծվել, թե ինչ  քանակ պետք է ունենա նախարարությունը, որպեսզի ճկուն աշխատի»,- ասաց փոխնախարարը։

Ամփոփելով և նկատի ունենալով խոսակցությունները, թե նախկինում էլ է եղել նախարարությունների միացման օրինակ, որը ձախողվել է, Ղարիբյանն ասաց․ «Բոլոր քայլերը կատարում ենք, որպեսզի միացումից էֆեկտիվությունն ու աշխատունակությունը չնվազի։ Մենք միանում ենք ԿԳՆ-ին, բայց դա չի նշանակում, որ մեր մոտից բոլորը կրճատվում են։ Այդտեղ էլ են լինելու  ուսումնասիրություններ, թե մեր որ թևն է ուժեղ, բայց դեռևս օդում խոսակցություններ են»,- նշեց Ղարիբյանը և կես կատակ կես լուրջ նշեց, որ դեռևս երկու նախարարություններին չեն «ամուսնացրել», սակայն մոտ օրերին կլինի այդ «խնամականչը»։

Արմինե Արմենակյան