Գարնանը արտագաղթի ականատեսը կլինենք. Լուսինե Հարոյան

Մամուլն օրերս ակտիվորեն հրապարակում է մի շարք մարզպետների տարեվերջյան պարգևատրումների ցանկը, ինչը հանրային լայն հնչեղություն է ստացել հակաօրինական լինելու պատճառով: 

«Ազգային առաջընթաց» կուսակցության վարչության անդամ Լուսինե Հարոյանը թեմայի վերաբերյալ ԼՈՒՐԵՐ.com-ի հետ զրույցում պնդեց, որ  միլիոնները գերազանցող պարգևատրումներն ու հարյուրավոր հազարների հասնող աշխատավարձերը չեն կարող վերացնել կոռուպցիոն ռիսկերը և դրա վերահսկումը պետք է լինի համակարգային:

Հարոյանը հիշեցրեց տարիներ առաջ կնքված որոշման մասին, ըստ որի՝ բարձրացվում էին դատավորների աշխատավարձերը. «Մեզ ասում էին, որ գումար չկա նվազագույն աշխատավարձերը բարձրացնելու համար, սակայն ահռելի չափերով բարձրացնում էին օրենսդիր, գործադիր և դատական իշխանության ներկայացուցիչների աշխատավարձերը: Միևնույն է, եթե պաշտոնյան 5000 դոլար աշխատավարձ էլ ստանա, նա 100.000 դոլարից չի հրաժարվելու, դա աբսուրդ է»:

Ըստ Հարոյանի՝ առայժմ խնդիրներին համակարգված լուծումներ չեն տրվում, և ներկայիս իշխանությունն էլ, կարծես թե, չի շտապում. «Այս տեմպերը պահպանելու դեպքում՝ գարնանը արտագաղթի ականատեսը կլինենք»:

«Ես համոզված եմ, որ նման խոշոր պարգևատրումներ կատարած նոր պաշտոնյաները, տեսնելով այն անպատժելիությունը, թե ինչպես են տարիներ շարունակ երկիրը թալանածները որոշ նվիրատվություններ անելով հանգիստ ապրում, իրենք ևս նույնն են անում: Մեր կուսակցությունը միշտ ասել է, որ խորհրդարան մտնելուց հետո առաջին քայլը լինելու է պետական պաշտոնյաների աշխատավարձերի կրճատումը: Էնտեղ մարզպետներ կային, որոնք աշխատել էին ընդամենը 3-4 ամիս, բայց արդեն 13-րդ աշխատավարձ են ստացել. սա ևս աբսուրդ է»,- շեշտեց Լուսինե Հարոյանը և հավելեց, որ այդպիսով նաև կկարողանային բարձրացնել թոշակները:

Իսկ ինչ վերաբերում է Սյունիքի մարզպետ Հունան Պողոսյանին, որն ինքն իրեն մեկ օրվա մեջ 2 անգամ պարգևատրել էր, մեր զրուցակիցը նկատեց. «Դե, Հունան Պողոսյանին շատերը գիտեն. դեռ նախկին իշխանության ժամանակներից նա օդիոզ դեմքերից էր: Ի վերջո, մարդիկ պետք է հասկանան, թե պարգևատրումն իրենից ինչ է ներկայացնում, ավելին՝ եթե պետական պաշտոնյաներն ստանան շատ ավելի նվազ աշխատավարձ, նրանց պարգևատրումներն էլ այդքան մեծ բեռ չեն լինի պետական բյուջեի վրա: Դա անբարոյականություն է»: 

Վերջում «Ազգային առաջընթաց» կուսակցության վարչության անդամ Լուսինե Հարոյանը հավելեց, որ առաջիկայում հանդես են գալու սահմանադրական փոփոխությունների նախագծով, որին արդեն իսկ միացել են քաղաքական մի շարք ուժեր, դրանք են՝ Հայաստանի Քրիստոնեա-ժողովրդավարական կուսակցությունը (ՀՔԺԿ), «Հայք»-ը, «Ցեղակրոն»-ը: «Մենք շատ վճռական ենք տրամադրված և ամեն ինչ անելու ենք, որ մեր նախագիծը մտնի խորհրդարան»,-ասաց Լուսինե Հարոյանը:

Արմինե ՄԻՔԱՅԵԼՅԱՆ