Քարսիթներով երթևեկելու «նպատակը»

Հայաստանի արդարադատության նախարարութայն կողմից կառավարության որոշումներում մի նախագիծ է դրվել շրջանառության մեջ, որը քննարկումների լայն դաշտ է ստեղծել: Փոփոխությունը վերաբերում է ճանապարհային երթևեկության անվտանգության ապահովմանը, ըստ որի՝ նախատեսվում է մինչև 12 տարեկան երեխաների փոխադրումը թեթև մարդատար և բեռնատար ավտոմոբիլներում ապահովել երեխայի քաշին և հասակին համապատասխանող մանկական պահող համակարգերի (քարսիթերի) օգտագործման միջոցով:

Նախ նշենք, որ թեման նոր չէ, ավելին՝ օրենքի նախագիծը ընդունվել է դեռևս 2007թ-ին, սակայն դեռևս դրանում փոփոխություններ և լրացումներ էին կատարվում: Իսկ մեքենաներում «քարսիթեր» տեղադրելու պահանջի մասին բարձրաձայնվեց 2018-ի ապրիլի 26-ին Սարալանջի փողոցում՝ դեպի «Հաղթանակի» զբոսայգի տանող հատվածում սարսափելի վթարից հետո, որի հետևանքով 1 տարեկան երեխան մահացել էր։ 

Նշված նախագիծը շրջանառության մեջ դնելն իր հետ մի շարք հարցեր է առաջ բերում, մասնավորապես այն, թե նույն դրույթներն ինչու չեն վերաբերում երթուղայիններին և այդ դեպքում ինչպես պետք է վերահսկողություն իրականացվեր, քանի որ շեշտվում են անվտանգության նկատառումները: «Վարորդի ընկեր» ՀԿ-ի համահիմնադիր Սերգեյ Ղահրամանյանը ԼՈՒՐԵՐ.com-ի հետ զրույցում նշեց, որ երթուղայինների մասով բացատրություն չունի և միգուցե «այլ տեղով է առանձնանում»:

«Կարծում եմ՝ հանրային տրանսպրտի մասին որոշումներն այլ կետերում զետեղված կլինեն, քանի որ այս պահին խոսքը միայն թեթև մարդատար և բեռնատար ավտոմոբիլների մասին է»,- մանրամասնեց Ղահրամանյանը:

Մեր այն ճշտող հարցին, որ տարօրինակ է որոշումն այնքանով, որ թեթև մարդատար և բեռնատար ամտոմոբիլների դեպքում կառավարությունը մտածում է երեխաների անվտանգության մասին, իսկ հանրային տրանսպրտի պարագայում ոչինչ չի խոսվում, Սերգեյ Ղահրամանյանը նկատեց.«Կարծում եմ՝ դա ավելի շատ հանրային տրանսպորտը կարգավորող որոշումներում պետք է լինի»:

Մեր զրուցակցի խոսքով՝ ամբողջ աշխարհում արդեն քարսիթների օգտագործումը բավականին լայն տարածում է գտել, և քարսիթով երթևեկելու դեպքում մահ չի գրանցվել: Ինչ վերաբերում է քարսիթների գնային քաղաքականությանն ու դրա ձեռք բերման հնարավորությանը, Սերգեյ Ղահրամանյանը նշեց, որ ինչպես նույն ավտոմոբիլների, այնպես էլ քարսիթների դեպքում գնային ճկուն համակարգ է գործում.«Եթե դիտարկենք միջին վիճակագրական մեքենաների գները, ապա կտեսնենք, որ միջինը 1.5 միլիոնն է, որը հարյուրհազարավոր դոլարների է հասնում, քարսիթի դեպքում միջինը 8000 դրամն է: Եթե մարդը վարում է էժան մեքենա և չունի թանկ քարսիթ գնելու հնարավորություն, նա հանգիստ կարող է օգտվել առավել էժան տարբերակից»:

Մեր զրուցակիցը վերջում հավելեց, որ դեռևս հաստատված չէ, թե քարսիթների բացակայության դեպքում որքան տուգանք է հասնում. «Նպատակը տուգանելը չէ, այլ անվտանգությունն ապահովելը»:

Արմինե ՄԻՔԱՅԵԼՅԱՆ