Կարեն Ղազարյանին առևանգել են հստակ նպատակով․ պատգամավոր

Փետրվարի 27- ին Ադրբեջանում 20 տարով ազատազրկվեց գերևարված Կարեն Ղազարյանը։ Հայաստանյան կողմն ասում է, որ ամեն ինչ անում է նրան վերադարձնելու համար։ Արդեն 8 ամիս է Կարենն Ադրբեջանում է, բայց իշխանությունները դեռ լռում են։  Նրա առողջական վիճակի մասին հիմնական տեղեկատվությունը ընտանիքի անդամները և համագյուղացիները ստանում են Ադրբեջանական կողմի հրապարակած տեսանյութերից։ Մինչ այս դեպքը, Կարենն ունեցել է որոշակի առողջական խնդիրներ։ 

Այս և սահանամերձ գյուղերի մի շարք խնդիրների մասին  ԼՈՒՐԵՐ․com-ը զրուցել է  «Լուսավոր Հայաստան» կուսակցության պատգամավոր Սարգիս Ալեքսանյանի հետ։

-Ինչու՞ և ինչպե՞ս Կարեն Ղազարյանը հայտնվեց Ադրբեջանում։

- Ադրբեջանը իրեն յուրահատուկ հայատյաց գործելաոճը կիրառում է նաև իրականության հետ որևէ աղերս չունեցող, Ադրբեջանում 20 տարի դատապարտված առողջական խնդիրներ ունեցող Կարեն Ղազարյանի գործով։ Նրան առևանգել են հստակ նպատակադրված՝ փոխանակել Արցախում իրենց պատիժը կրող ոճրագործների հետ, սա բոլորիս է հայտնի:

-Ի՞նչ միջոցներ պետք է ձեռնարկվեն այս հարցը լուծելու համար։

-Ի՞նչ պետք է անի մեր իշխանությունը. պետք է արդեն միջազգային կառույցներում բոլոր հնարավոր և անհնարին միջոցները գործի դրվեին, կլինի դա պաշտոնական, ոչ պաշտոնական հանդիպումներում, ամբիոններից ելույթներ հնչեցվեր, մի խոսքով ողողեր Կարենի թեման միջազգային քաղաքական հարթակներում, սակայն այսօր ունենք անբավարար մի վիճակ, որտեղ նույնիսկ Կարմիր խաչը, որը ունի հստակ գործառույթներ, խիստ թերանում է կատարել դրանք: Երբ պարոն վարչապետը Նոյեմբերյանում նախընտրական ելույթով հանդես էր գալիս, հավաքի մասնակիցներից մեկի մոտ գրված Կարենին վերաբերվող պաստառը տեսնելով ասաց, որ Կարենը միայն ձերը չէ, Կարենը նաև մերն է, իսկ որտե՞ղ երևաց, որ նաև ձերն է, պարոն վարչապետ: 

Մենք, փափուկ քաղաքականություն վարելով, կկորցնենք մեզ համար բարձրագույն արժեք հռչակած ՀՀ քաղաքացու և′ կյանքը, և′ արժանապատվությունը: Ասածս թող պաթոսային կամ չափազանցված չթվա, բայց մենք իրավունք չունենք ժամանակ կորցնելու, պետք է անհապաղ ազատագրել թշնամու ճիրաններում հայտնված հայ ընտանիքի միակ շարունակողի կյանքը, սա նաև մեր պատվի հարցն է: Այստեղ միայն Կարեն Ղազարյանի հարազատների և միայն բերդավանցու խնդիրը չէ, սա բոլորիս է վերաբերվում՝ Ագարակից մինչև Ամասյա, պետք է յուրաքանչյուր գիտակից հայ զգա,և հավատում եմ, որ զգում և ցավում են այս 8 ամիսների ընթացքում անելանելի վիճակում գտնվող մեր հայրենակցի ճակատագրով: Կարենի միակ «մեղավորոթյունը» դա սահմանի բերանին ապրելն է։

- Սահմանին կա նաև սահմանապահների աշխատավարձի և քանակի խնդիր։ Այս հարցի լուծումն ինչպե՞ս եք տեսնում։

(Հավելենք, որ պայմանագրային զինծառայողների աշխատավարձը 100․000-ից 120․000 է)

-Հայաստանը տոկոսային հարաբերությամբ ամենաշատ ոստիկանական ռեսուրսներ ներդրած երկրներից է, որը արվել է նախորդ կոռումպացված իշխանությունների ժամանակ՝ որպես իշխանությունը պահելու միջոց, որը հեղափոխությունից հետո կորցրել է իր «բացառիկ նշանակությունը»  և գտնում եմ՝ պետք է վերաբաշխում անել ՝այդ միջոցները ուղղելով դեպի պաշտպանության նախարարություն: Մենք այսօր ավելի շատ ունենք սահմանապահների անհրաժեշտություն, քան ոստիկանների։

Ասպրամ Փարսադանյան