Սաակաշվիլու հայամետ քաղաքականությունն ավարտված է. ադրբեջանցի քաղաքագետ

Վերջին շրջանում Վրաստանի հայերի ակտիվ պայքարը՝ Ջավախքի հարցում, արդյունքն է Վրաստանի նախագահի հայամետ քաղաքականության։ Այս մասին «SalamNews» լրատվական գործակալությանն է հայտնել Քաղաքական տեխնոլոգիաների և նորարարությունների կենտրոնի տնօրեն՝ քաղաքագետ Մուբարիզ Ահմեդոօղլուն։

«Սակայն Սաակաշվիլու հայամետ քաղաքականությունն ավարտված է։ Պաշտոնական Թբիլիսին որևէ հարցում օգնություն կամ օժանդակություն չդրսևորեց տեղի հայերի կամ այն հայերի համար, ովքեր գալիս էին Վրաստան այլ երկրներից։ Սաակաշվիլին Ջավախքի հարցում հայերին խոստումներ էր տալիս միայն այն պատճառով, որ մեծ հույսեր էր կապում ԱՄՆ–ում հայկական լոբբինգի հետ՝ կարծելով թե այն կարող է ծառայեցնել ԱՄՆ–ում իր շահերին»,- ասել է Ահմեդօղլուն։ 

Ըստ նրա՝ Սաակաշվիլին, չկարողանալով հասնել իր այդ նպատակին, այժմ փորձում է ԱՄՆ–ի հրեական լոբբին իր շահերին ծառայեցնել։ Վերլուծաբանը հայտնել է, որ տարածաշրջանում Թուրքիայի ազդեցության աճի ֆոնին, Վրաստանի նախագահն անցել է հայերին ճնշելու քաղաքականությանը՝ կիրառելով նախկին կոշտ մեթոդները։

«Մինչ այդ, Վրաստանում բնակվող հայերը մշտական ​​էյֆորիայի մեջ էին գտնվում եւ լավ հարաբերություններ ունեին վրացական իշխանությունների հետ»,– ասել է վերլուծաբանը։ Քաղաքագետը մեկնաբանել է նաև պաշտոնական Թբիլիսիի դիրքորոշումը Ղարաբաղյան կոնֆլիկտի վերաբերյալ՝ ասելով, որ Սաակաշվիլին միշտ էլ փորձել է Ադրբեջանի ռեսուրսների հաշվին ձեռք բերել տարածաշրջանում դոմինանտ դիրքեր։

«Ահա թե ինչու է  Սահակաշվիլին շահագրգռված ադրբեջանա-հայկական հակամարտության շարունակմամբ, որպեսզի Հայաստանն ու Ադրբեջանը կախվածություն ձեռք բերեն Վրաստանից և բոլոր միջազգային ծրագրերի իրականացման համար Վրաստանը տարածաշրջանում ծառայի որպես տարանցիկ երկիր»,- ասել է Ահմեդօղլուն։ 

Կենտրոնի ղեկավարը հիշեցրել է Վրաստանի ԱԳ նախարար Գրիգոլ Վաշաձեի այցը Բաքու, որտեղ վերջինս հայտարարել է, որ Ղարաբաղյան կոնֆլիկտի հարցում պաշտոնական Թբիլիսին նախընտրում է պահել չեզոքություն՝ հետագա փոխադարձ մեղադրանքներից խուսափելու համար։ Հաղորդում է «Regnum» լրատվական գործակալությունը։