Ըստ ԱՎԿ-ի՝ էլեկտրաէներգիայի արտադրությունը նվազել է 14%-ով. Անդրանիկ Թևանյան

«Պոլիտէկոնոմիա» հետազոտական ինստիտուտի տնօրեն Անդրանիկ Թևանյանը ֆեյսբուքի իր էջում գրել է.

«Եվս մեկ վիճակագրական հանելուկ. ԱՎԿ–ի հրապարակած մակրոտնտեսական եռամսյակային ցուցանիշներում հանելուկային թվերի պակաս չկա։

Հարցն այն չէ, որ տվյալները սխալ են. այլընտրանքային տեղեկատվական աղբյուրի բացակայության պայմաններում պետք է հիմք ընդունել պաշտոնականը։ Խնդիրն, ըստ այդմ, վիճակագիրներին չի վերաբերում։

Հարցն այն է, որ կան տվայլներ, որոնք որոշակի կազուսներ են պարունակում իրենց մեջ, հարցեր են առաջացնում և վիճակագրական ֆենոմեն են։

Այդ ֆենոմեններից մեկի մասին երեկ գրել էի։ Ներկայացնեմ մեկ այլ ֆենոմեն, որի մասին պարբերաբար բարձրաձայնում է «Պոլիտէկոնոմիայի» տնտեսական մեկնաբան Արա Գալոյանը։

Ըստ ԱՎԿ–ի՝ այս տարվա առաջին եռամսյակում, 2018–ի նույն ժամանակահատվածի համեմատ, էլեկտրաէներգիայի արտադրությունը նվազել է 14 տոկոսով։ Եվ դա այն դեպքում, երբ արդյունաբերական արտադրանքի ծավալը աճել է 2 տոկոսով, իսկ շինարարությունը՝ 10,8 տոկոսով։

Ստացվում է, որ մեր արդյունաբերությունը և շինարարությունն աճում են՝ ի հեճուկս էլեկտրաէներգիայի արտադրության նվազման։ Մենք սկսել ենք քամու և արևի էներգիա՞ օգտագործել տնտեսության նշյալ ճյուղերում։ Թե՞ հիմա նոր բան չենք արտադրում և ընդամենը նախորդ տարվա արտադրածն այս տարի ենք իրացնում, ու դա է պատճառը, որ հոսանքի ծավալի նվազում է արձանագրվում՝ արդյունաբերական արտադրանքի ծավալների աճի ֆոնին։ Իսկ միգուցե ա՞յլ պատճառներ կան, որոնք բերել են էլեկտրաէներգիայի արտադրության նվազմանը (օրինակ՝ արտահանման մասով)։

Մի խոսքով, հարցեր կան, որոնց պատասխանները տալու համար ամբողջական տեղեկատվության պակաս կա։ Հենց որ պաշտոնապես այդ տվյալները հրապարակվեն, մեր կենտրոնն անպայման կտա իր գնահատականը։

Ուշագրավն այն է, որ սա կարճաժամկետ ֆենոմեն չէ։ Նոր իշխանությունների ձևավորումից հետո այս հակադարձ համեմատական կապն արդյունաբերության աճի ու էլեկտրաէներգիայի արտադրության նվազման միջև արձանագրվել է գրեթե ամեն ամիս»։