Le Monde պարբերականն անդրադարձել է ԼՂ նախագահական ընտրություններին

«Լեռնային Ղարաբաղի քաղաքացիները հրադադարի ռեժիմի պայմաններում հուլիսի 19–ին ընտրում էին իրենց նոր նախագահին, որն էլ, ըստ մի շարք վերլուծաբանների, Կովկասի այդ տարածաշրջանում մի նոր հակամարտության պատճառ կարող է դառնալ», – գրում է Le Monde–ը։

Լեռնային Ղարաբաղն անկախություն է հռչակել 1992-ին՝ պատերազմական իրավիճակում։ Հայաստանը և Ադրբեջանը մինչ այժմ չեն կարողանում այդ տարածքի կարգավիճակի շուրջ համաձայնության գալ։ 

«Շփման գծում պարբերաբար կրակոցներ են հնչում, ինչի պատճառով վերջին շրջանում նման միջադեպերի կտրուկ աճ է նկատվում», – նշված է պարբերականում։ «145 հազար բնակչություն ունեցող անկախ հանրապետությունում 99 հազար ընտրող է գրանցված։ ԼՂ հանրապետության միջազգային ճանաչումը, անվտանգությունը և բնակչության բարեկեցիկ կյանքի ապահովումը նախագահական ընտրություններին իրենց թեկնածությունը առաջադրած թեկնածուների՝ գործող նախագահ Բակո Սահակյանի և պաշտոնաթող գեներալ Վիտալի Բալասանյանի նախընտրական ծրագրերի հիմնադրույթներն էին։ 

Ըստ վերլուծաբանների՝ ԼՂ Հանրապետության գործող նախագահ Բակո Սահակյանի հաղթանակը որևէ կասկած չէր հարուցում, քանի որ նրան աջակցում էին ԼՂ Ազգային ժողովում ներկայացված երեք կուսակցություններ։ 51-ամյա Սահակյանը ընտրողներին խոստացել է շարունակել տնտեսական և սոցիալական բարեփոխումները և ընտրողներին վստահեցրել, որ իր ազդեցության տակ գտնվող բոլոր ռեսուրսները ներդնելու է՝ Լեռնային Ղարաբաղի նկատմամբ Ադրբեջանի կողմից վերահսկողությունը վերականգնելու ցանկացած ոտնձգություն կանխելու համար։ Բաքուն ԼՂ նախագահական ընտրությունները ոչ իրավակարգ է ճանաչել»,-նշված է պարբերականում։