ՄԱԿ. Ադրբեջանը խախտում է Սովորական սպառազինությունների մասին պայմանագիրը

Հրապարակվել է ՄԱԿ-ի գլխավոր քարտուղար Բան կի Մունի` «Սովորական սպառազինությունների վերահսկումը տարածաշրջանային ու ենթատարածաշրջանային մակարդակներում» զեկույցը, որում ներկայացված է Հարավային կովկասում սպառազինությունների հետ կապված իրավիճակը:

«Եվրոպայում սովորական սպառազինությունների մասին պայմանագրի ֆունդամենտալ դերն ու կարևորությունը հատկապես մեծացել է Հարավային կովկասի տարածաշրջանում, որտեղ Ադրբեջանը սպառազինությունների վտանգավոր մրցավազք է սանձազերծել: Եվրոպայում սովորական սպառազինությունների մասին պայմանագրի իրագործման մասին պաշտոնական տեղեկատվության համաձայն' Ադրբեջանը գերազանցել է պայմանագրով սահմանափակված երեք տեսակի սպառազինությունների քանակը:

Ադրբեջանցիներն ունեն 381 մարտական տանկ` 220 թույլատրելիի դեպքում, հրետանային սպառազինության 518 միավոր` 285 թույլատրելիի դեպքում և 287 մարտական զրահամեքենա` 220 թույլատրելիի դեպքում: Անցած տարի Ադրբեջանն իր հրետանային զինատեսակների քանակն ավելացրել է 47-ով, հարավածային ուղղաթիռներինը` 2-ով, իսկ զրահամեքենաներինը` 106-ով:

Ադրբեջանի ռազմական բյուջեի զգալի ավելացումը վերջին տարիներին (այս տարի ռազմական ծախսերի համար Բաքուն նախատեսել է 3,47 մլրդ դոլար), ինչպես նաև ադրբեջանական ղեկավարության մշտական ագրեսիվ ու կոշտ ռազմական հռետորաբանությունը մեծացնում են երկու ազգերի միջև անդունդը, ավելացնում լարվածությունն ու վտանգում առկա խնդիրների, մասնավորապես ղարաբաղյան հակամարտության խաղաղ կարգավորմանն ուղղված բանակցային գործընթացը:

Այս առումով, Ադրբեջանի անհետևողական քաղաքականությունը մեծ բացասական ազդեցություն է ունենում' տարածաշրջանում վստահության ու համագործակցության մթնոլորտի ձևավորման` Հայաստանի ջանքերի վրա»,- մասնավորապես ասված է զեկույցում:

Tert.am