2019 թվականից Շիրակի մարզի դպրոցներում իրականացվելու է համընդհանուր ներառական կրթություն

Նոր  ուսումնական տարում Շիրակի մարզում ակնկալվում է աշակերտների թվաքանակի աճ. Աշակերտների թիվը կլինի շուրջ 33000։ Այս  մասին օգոստոսի 31-ին Շիրակի մարզի  հանրակրթական դպրոցի տնօրենների ամենամյա խորհրդակցության ժամանակ նշեց Շիրակի մարզպետարանի կրթության, մշակույթի և սպորտի վարչության պետ Հրայր Կարապետյանը: Խոսելով անցած  ուսումնական տարում արձանագրած  հաջողությունների մասին պատասխանատուն տեղեկացրեց, որ նախորդ տարիների համեմատ գրանցվել է 12-րդ դասարանի շրջանավարտների թվի աճ, որը նպաստեց նաև ԲՈՒՀ-երում ընդունելության թվի աճին: Նախորդ ուսումնական տարվա՝ 830 շրջանավարտի փոխարեն, 2019 թվականի մայիսին ՀՀ Շիրակի մարզի շրջանավարտների թիվը կազմել շուրջ 1725 աշակերտ, որից 810-ը մարզային ենթակայության, 874-ը՝ ՀՀ ԿԳՆ ենթակայության և 41-ը՝ ոչ պետական ուսումնական հաստատություններ: ԲՈՒՀ–երի ընդունելություն՝ 82.4%, հայտագրվել է՝ 884 դիմորդ, ընդունվել՝ 728։ 

2019 թվականից ՀՀ Շիրակի մարզի դպրոցներում իրականացվելու է համընդհանուր ներառական կրթություն, հատուկ դպրոցների փոխարեն ստեղծվելու են մանկավարժահոգեբանական կենտրոններ: «Համակարգի կարևոր նպատակներից է կրթության առանձնահատուկ պայմանների կարիք ունեցող երեխաների համար ուսումնական հաստատություններում համապատասխան պայմանների ստեղծումը: Համընդհանուր ներառական կրթության ծրագրի իրականացման համար վերապատրաստվել են 700 մանկավարժ»,-նշեց Հրայր Կարապետյանը։

 2019-2020 ուսումնական տարում 1-ին դասարան են հաճախելու 3097 աշակերտ: Կրթական որակի բարելավման գործում առանձնահատուկ դեր ունեն նախակրթարանները: Մարզում գործում են համայնքային 54 նախակրթարաններ, որտեղ հաճախում են  մոտ 3500 երեխա: Խնդիրը մասամբ մեղմվեց «Օգնություն նախադպրոցական տարիքի երեխաներին» ներդրմամբ, որի արդյունքում մարզի թվով 62 դպրոցներում բացվեցին և գործում են նախադպրոցական խմբեր՝  1003 սան: