Նոր ուսումնական տարին Գեղարքունիքի մարզում նշանավորվեց հինգ նոր նախակրթարանների բացմամբ

Նոր ուսումնական տարին  Գեղարքունիքի մարզի չորս համայնքների հինգ դպրոցներում նշանավորվեց նոր նախակրթարանների բացմամբ, որոնց ժապավենները կտրեցին ՀՀ ԿԳՄՍ  նախարար Արայիկ Հարությունյանը եւ  Գեղարքունիքի մարզպետ Գնել Սանոսյանը: 

Ինչպես  տեղեկացրին Գեղարքունիքի մարզպետարանի ԿՄՍ վարչությունից, նախակրթարանները  հիմնվել են ՀՀ ԿԳՄՍ նախարարության «Կրթական ծրագրերի կենտրոն» ԾԻԳ ՊՀ-ի միջոցներով եւ համայնքապետարանների մասնակի ներդրումներով, բացառությամբ Նորաշենի նախակրթարանի, որտեղ ներդրումը ամբողջովին կատարվել է պետության կողմից:   §Արմենպրես»-ի տեղեկացմամբ՝ նախարարի եւ  մարզպետի  համատեղ այցի առաջին կանգառը Նորաշենի հիմնական դպրոցում էր,  որտեղ   նորաբաց նախակրթարան  այս տարի արդեն հաճախում են  16 երեխա: Նոր ուսումնական տարին այս դպրոցում դիմավորեցին  տոնական միջոցառմամբ, ուրախ երգ ու պարով: ԿԳՄՍ նախարար Արայիկ Հարությունյանը, ողջունելով ներկաներին, նշեց, որ պետությունը կարեւորում է նախակրթարանների դերը եւ դրանք ձգտում է ստեղծել այն համայնքներում, որտեղ մանկապարտեզներ չեն գործում, ու երեխաները զրկված են նախադպրոցական կրթությունից: Ըստ նախարարի՝ ներկա փոփոխությունների շեմին ՀՀ կառավարությունն ակնկալում է ներգաղթ, ինչի հաշվին  ակնկալվում է աշակերտների թվի ավելացում նախադպրոցական ու հանրակրթական հաստատություններում: 

Պետական այրերի հաջորդ այցը Զոլաքարի թիվ 1  եւ թիվ 2 միջնակարգ դպրոցներում էր, որտեղ  բացված նախակրթարաններից յուրաքանչյուրում հաճախում են 50 երեխա: Ինչպես նախարարին եւ մարզպետին տեղեկացրեց Զոլաքար համայնքի ղեկավար Արման Ղազարյանը, Զոլաքարում այս պահի դրությամբ հաշվառված են նախադպրոցական տարիքի ավելի քան 300 երեխա, որոնց համար նախատեսվում է նոր մանկապարտեզի շենքի կառուցում, որի մեկնարկը տրվելու է  առաջիկա օրերի ընթացքում՝ սուբվենցիոն ծրագրի շրջանակում: Զոլաքարի թիվ 2 միջնակարգ դպրոցում նախարարը եւ մարզպետը դիտարկեցին 2017 թվականից սկսված եւ ընթացքի մեջ գտնվող հիմնանորոգման աշխատանքները, որոնք նախատեսվում է ավարտել մինչեւ տարեվերջ: Զոլաքարի ազգաբնակչության անունից համայնքի ղեկավար Արման Ղազարյանը շնորհակալություն հայտնեց նախարարին ու մարզպետին՝ համայնքի կրթական կյանքի զարգացմանն աջակցելու եւ նպաստելու համար:  

Մարտունու թիվ 2 հիմնական դպրոցում եւս աղ ու հացով  եւ մեծ տոնախմբությամբ դիմավորեցին հյուրերին: Նախարարը եւ մարզպետը կտրեցին հերթական նախակրթարանի ժապավենը:  Նորաբաց նախակրթարանն այս տարի ընդունել է  25 սաների, ովքեր հիմնականում սոցիալապես անապահով ընտանիքների երեխաներ են :

«Մենք տեղեկացել էինք, որ Մարտունի քաղաքում նախակրթարան ստեղծելու անհրաժեշտություն կա եւ ընդառաջեցինք այդ պահանջին: Այսօր մենք գտնվում ենք ակտիվ բարեփոխումների շրջանում, որտեղ մեծ դերակատարություն ունեն  ուսուցիչները , ծնողները, համայնքի բնակիչները, ՏԻՄ-երը: Ձեզանից յուրաքանչյուրը իր մասնակցությունը պետք է ունենա այդ բարեփոխումներին:  Դպրոցը կզարգանա եւ կրթությունը կլինի լիարժեք, եթե  յուրաքանչյուր ծնող իր մասնակցությունն ունենա կրթական համակարգի ձեւավորմանը եւ երեխայի կրթության ապահովմանը»,- իր խոսքում նշեց նախարար Արայիկ Հարությունյանը:

«Այսօր մեր հանրապետությունում բացված 18 նախակրթարաններից 5-ը գտնվում են Գեղարքունիքի մարզում, եւ դա մեզ համար շատ ուրախալի փաստ է:  Մարտունու տարածաշրջանում տարեցտարի երեխաների թիվն ավելանում է, դրան զուգահեռ ավելանում է նաեւ նախակրթարանների եւ մանկապարտեզների պահանջը: Մենք պատրաստակամ ենք անել հնարավորը՝ պատշաճ կրթություն եւ դաստիարակություն ապահովելու մատաղ սերնդի համար»,- նշեց Գեղարքունիքի մարզպետ Գնել Սանոսյանը:

«Այսօր մենք ապրում ենք մի փայլուն ժամանակահատված, որտեղ որոշողը ոչ թե ծանոթ-բարեկամներն են, այլ՝ գիտելիքը, որը մարդիկ ձեռք են բերում միայն եւ միայն կրթության միջոցով: Եթե մեր մատաղ սերունդն այսօր ճիշտ կրթություն ստանա ու խորը գիտելիքներ ձեռք բերի, ապա մենք վաղը կունենանք շատ ավելի հզոր հայրենիք: Մենք Մարտունիում արդեն բացում ենք թվով երկրորդ նախակրթարանը, բայց, հավատացնում եմ, շուտով կբացենք նաեւ երրորդ, չորրորդ ու հինգերորդ նախակրթարանները, քանի որ ապահովել ու ապահովում ենք ծնելիության բարձր նիշ: Ու պատահական չէ, որ Մարտունիում են գտնվում մեր մարզի ամենագերբեռնված մանկապարտեզներն ու դպրոցները»,-նշեց Մարտունու քաղաքապետ ԱրմենԱվետիսյանը:

Գավառի Մնացական Բունիաթյանի անվան թիվ 8 միջնակարգ դպրոցում սեպրեմբերի 1-ը նշանավորվեց երկու իրադարձությամբ՝ ճանաչված  գիտնական   եւ մանկավարժ Մնացական Բունիաթյանի կիսանդրու տեղադրմամբ եւ նախակրթարանի բացմամբ: Ողջունելով ներկաներին՝ նախարարը եւ մարզպետը իրենց ելույթներում կարեւորեցին այն մեծ ավանդը, որը հայրենի գիտության եւ մանկավարժության ոլորտում ներդրել է Մնացական Բունիաթյանը: Այստեղ նորաբաց նախակրթարանն  իր դռները բացեց 26 սանի առջեւ:

Սեւանի ավագ դպրոցում  մարզպետը եւ նախարարը ծանոթացան  դպրոցի հիմնանորոգման աշխատանքների ընթացքին: Դպրոցի տնօրենը տեղեկացրեց, որ շինարարական աշխատանքների մեկնարկը տրվել է այս տարվա հուլիսից եւ կավարտվի 2021 թվականի հունիս ամսին: Այժմ դպրոց հաճախող 230 աշակերտներն ուսումնական պարապմունքներն անցկացնում են նույն հաստատության երկրորդ մասնաշենքում:

ԿԳՄՍ նախարարի եւ Գեղարքունիքի մարզպետի շրջայցի վերջին կանգառը Սեւանի թիվ 5 միջնակարգ դպրոցում էր: Այստեղ նրանք դիտարկեցին  դպրոցի հիմնանորոգման աշխատանքները, որոնք ընթանում են պետբյուջեի միջոցներով եւ Հայաստանի Տարածքային Զարգացման Հիմնադրամի պատվիրատվությամբ: Շինարարության որակի համար նախարարը եւ մարզպետն արեցին դիտողություններ, որոնց վերացման համար  տվեցին համապատասխան ցուցումներ:

Նոր ուսումնական տարում,   նախնական տվյալներով,  Գեղարքունիքի մարզի   հանրակրթական հաստատություններ կհաճախեն 28 հազար 844 աշակերտ, որոնցից 3092-ը առաջին դասարանցիներն են:-0-/30/