«Հայաստանի քաղաքացիական հասարակությունն աճում է». ԱՄՆ դեսպան (Տեսանյութ)

Հայաստանում ԱՄՆ-ի դեսպան Ջոն Հեֆերնը իր 26-րդ տեսաբլոգում անդրադարձել է Թռչկանի ջրվեժ-ի, Մաշտոցի այգու, Փակ շուկայի և «Հարսնաքարի» գործով քաղաքացիական ակտիվությանը։

Դեսպանն իր խոսքում մասնավորապես նշել է.-«Վերջերս մենք ականատեսն ենք եղել մի քանի արդյունավետ արշավների, որոնց շրջանակներում հայերը հանդես էին գալիս դրական փոփոխությունների խթանման դիրքերից։ Հունիսին պետքարտուղար Քլինթոնը և միջազգային հանրությունը իրենց գնահատանքը հայտնեցին բնապահպաններին, ովքեր խաղաղ ակցիաների միջոցով պաշտպանել էին Թռչկանի ջրվեժն ու հարակից պահպանվող տարածքը։ Նույն բնապահպանների խմբի մի մասն էլ հաջողության է հասել Մաշտոցի այգու կանաչ տարածքը պահպանելու հարցում։ Քաղաքացիական հասարակությունը նաև ակտիվություն հանդես բերեց Երևանի պատմական Փակ շուկայի հարցում։ Հենց վերջերս էլ «Հարսնաքար» ռեստորանում տեղի ունեցած միջադեպի հետևանքով բողոքի մեծ ալիք առաջացավ, որի մասնակիցները պահանջում էին պատասխանատվության ենթարկել ծեծելու միջոցով զինվորական բժշկին մահվան հասցնելու ողբերգական դեպքի մեղավորներին»։

Դեսպանը նաև հայտատարարել է, որ Հայաստանի քաղաքացիական հասարակությունն աճում է, և ինչպես նշված օրինակներն են ցույց տալիս, այն օրեցօր դառնում է առավել հզոր և առավել արդյունավետ։

«Հայաստանի քաղաքացիական հասարակության առաջ ծառացած խոչընդոտներից մեկը մատուցած ծառայությունների դիմաց վճարումներ ստանալու իրավական սահմանափակումն է այս կազմակերպությունների համար, ինչը վերջիններիս թույլ կտար ֆինանսապես առավել ապահովված լինել։ Միացյալ Նահանգներում մենք հարկային օրենսդրությամբ աջակցում ենք հասարակական կազմակերպություններին,- նշում է դեսպանը և ավելացնում, որ Հայաստանում անելիքներ դեռ շատ կան։

«Չնայած լուծման կարիք ունեցող խնդիրներին, Հայաստանի քաղաքացիական հասարակությունը հպարտանալու շատ բան ունի։ Մենք ողջունում ենք այն խիզախ ու նվիրյալ հայերին, ովքեր ամեն օր եռանդագին աշխատում են դրական փոփոխություններ ապահովելու նպատակով։ Իսկ մենք, որտեղ կարող ենք, ուրախությամբ հանդես ենք գալիս որպես գործընկեր, որպեսզի Հայաստանը դառնա ավելի հզոր, ավելի բարեկեցիկ ու ավելի ժողովրդավարական երկիր», -խոսքն ամփոփելով նշեց Հայաստանում Միացյալ Նահանգների դեսպանը։