Պարտատոմսեր՝ Ռամիլ Սաֆարովի էկստրադիցիայի դիմա՞ց

Հունգարական Figyelő շաբաթաթերթը, հղում կատարելով այդ երկրի Էկոնոմիկայի նախարարության վստահելի աղբյուրին, հրապարակել էր, որ Ադրբեջանի կառավարությունը ձգտում է ձեռք բերել հունգարական կառավարության կողմից թողարկվող 2-3 մլրդ եվրոյին համարժեք նպատակային սուվերեն պարտատոմսեր (Government bonds): Այս մասին հայտնում է panorama.am-ը:

Ադրբեջանցիների հետաքրքրությունը հունգարական պետական պարտատոմսերի նկատմամբ իբրև թե բացատրվում է դրանց բարձր եկամտաբերությամբ, թեև մեկ այլ հրապարակման մեջ նշվում է, որ Ադրբեջանը պատրաստ է այդ պարտատոմսերը ձեռք բերել նույնիսկ ավելի ցածր եկամտաբերության դեպքում: Հոդվածագրի մոտ սա հարց է առաջացրել, թե, ինչով է պայմանավորված ադրբեջանցիների հետաքրքրությունը հունգարական արժեթղթերի նկատմամբ, երբ օտարերկյա ներդրողների կողմից հետաքրքրությունը զգալի նվազել է:

«Խնդիրը միայն տնտեսական չէ: Անցած տարվա նոյեմբերին Հունգարիայի նախագահ Պալ Շմիդտի Ադրբեջան պաշտոնական այցելությունից ադրբեջանական մամուլում ակտիվացան խոսակցությունները Ռամիլ Սաֆարովի հանձման (էկստրադիցիայի) մասին: Ըստ այդ հրապարակումների՝ հնարավոր է Հունգարիայի և Ադրբեջանի միջև համաձայնության ձեռք բերում և համապատասխանաբար էկստրադիցիայի մասին երկու երկրների միջև պայմանագրի կնքում»,-գրում է հեղինակը:

Հայաստանյան մոտ 50 ՀԿ-ներ հանդես են եկել հայտարարությամբ, որով մտահոգություն են հայտնում գործարքի հետևանքով Ռամիլ Սաֆարովի՝ Ադրբեջանին հնարավոր հանձնման (էկստրադիցիա) կապակցությամբ:

Հիշեցնելով 2004 թվականի փետրվարի 19-ին Հունգարիայի մայրաքաղաք Բուդապեշտում տեղի ունեցած ահասարսուռ իրադարձությունը, երբ ուշ գիշերով ադրբեջանցի սպա Ռամիլ Սաֆարովը կացնահարեց քնած հայ սպա Գուրգեն Մարգարյանին և ադրբեջանական կողմի՝ հանցագործին արդարացնելու ու մեծարելու փորձերը, հայտարարության հեղինակներն այնուհետև ասում են.

«Մենք մեր պարտքն ենք համարում դիմել հունգարական հասարակությանն ու պետական մարմիններին՝ կոչ անելով թույլ չտալ Սաֆարովի հանձնումը Ադրբեջանին, որտեղ նրան, անկասկած, սպասում է ոչ թե պատժի հետագա կրում, այլ՝ ազատություն, դափնիներ և ավելի մեծ հերոսացում: Մենք կոչ ենք անում բարեկամական Հունգարիայի համապատասխան կառույցներին մտածել այս քայլի անխուսափելի հետևանքների մասին: Սաֆարովը հունգարական դատարանի կողմից սահմանված պատիժը պետք է կրի միայն հանցանքի իրականացման երկրում' խիստ ռեժիմի գաղութում: Դա է պահանջում ոչ միայն գազանաբար սպանված հայ երիտասարդի հիշատակը, այլ նաև Հունգարիայի' որպես մարդու իրավունքներին, բարոյականությանն և մարդասիրությանը հավատարիմ երկրի պարտավորությունները»: