ԱԱԾ հրավիրվելու պատճառը ՍԴ դիմաց ունեցածս ճեպազրույցն էր. Ռուբեն Հակոբյան

«ԱԱԾ հրավիրվելու պատճառը երեկ ՍԴ դիմաց ունեցածս ճեպազրույցն էր, որի ընթացքում Սահմանադրական կարգը տապալելու կոչեր են հնչել, քննադատություն էր եղել Նիկոլ Փաշինյանի հասցեին և ասել էի, որ վերջինս հակաօրինական միջոցներով, հակասահմանադրական քայլերով անում է այն, ինչ ուզում է։ Սահմանադրական դատարանին պետք է տեր կանգնել, որովհետև այդ միակ բաստիոնը, որը կարողանում է կենդանության նշույլներ ցույց տալ և չի ենթարկվում վարչապետի բռնատիրական նկրտումներին, մենք պետք է կարողանանք տեր կանգնել»- այս մասին այսօր ԱԱԾ-ի մոտ լրագրողների հետ զրույցում ասաց «Վերնատուն» ակումբի անդամ, քաղաքական վերլուծությունների «Ակունք» կենտրոնի տնօրեն Ռուբեն Հակոբյանը:

Նրա խոսքով, եթե իրավապահները քրեաիրավական գնահատականներ չտվեցին Նիկոլ Փաշինյանի արարքներին, ապա յուրաքանչյուր քաղաքացի կարող է անել այն, ինչ արել է Փաշինյանը:

«Ամեն օր արթնանում ես, ու բոլորը խոսում են, որ իշխանությունը որդեգրել է հակաօրինական ու հակասահմանադրական  ուղղություն` ի դեմս Նիկոլ Փաշինյանի: Լավ, հասկացանք, ինքը թքած ունի և՛ Սահմանադրության, և՛ օրենքների վրա, ինքը, և իր ընտանեկան կապալը անում է այն, ինչ ուզում է։ Պետական կառույցներն այսօր գոյություն չունեն, կամ իշխանության ճյուղերն այսօր գոյություն չունեն, իր անմիջական հարկադրանքի ու պարտադրանքի տակ են գտնվում և, բնականաբար, ասում ենք՝ բավական է այլևս: Ինքը ուշադրություն չի դարձնում դրա վրա, հետևաբար պետք է համարժեք քայլեր ձեռնարկել, դրանք էլ ես ուրիշ բան չեմ ասում, այն գործիքակազմը, որով Փաշինյանը եկել է իշխանության` փողոցները փակելով, ռադիոտան դուռը ջարդելով»,-ասաց Հակոբյան: