Իրանյան գագաթաժողովը սկսվեց. Չմիավորման շարժումը նոր թա՞փ է հավաքում

Երեկ Թեհրանում սկսվել են Չմիավորման շարժման 16-րդ գագաթաժողովի աշխատանքները: Ակնկալվում է, որ հիմնական քննարկումները կընթանան Իրանի միջուկային ծրագրի շուրջ:

Փորձագետների նիստով մեկնարկած գագաթաժողովը կտևի 6 օր: Նիստը, որին մասնակցել է պատկառելի թվով՝ 107 պատվիրակ, բացել է Իրանի արտգործնախարար Ալի Աքբար Սալեհին:

Փորձագիտական մակարդակով քննարկումներին կհետևի անդամ-պետությունների վարչապետերի հանդիպումը՝ օգոստոսի 28-29-ին, և գագաթաժողովը կեզրափակի բարձր՝ ենթադրաբար նախագահների մակարդակով հանդիպումը՝ օգոստոսի 30-31-ին: Այս մասին հաղորդում է Իրանի պաշտոնական Իրնա գործակալությունը:

Հիշեցնենք՝ ԱՄՆ-ը կոչ էր արել պետությունների ղեկավարներին և ՄԱԿ-ի Գլխավոր քարտուղարին չմասնակցել իրանյան գագաթաժողովին: Չնայած դրան՝ Բան Կի Մունը կմեկնի Թեհրան:

Ի դեպ, ըստ որոշ՝ դեռևս պաշտոնապես չհաստատված տվյալների՝ Չմիավորման շարժման թեհրանյան գագաթաժողովին կմասնակցի նաև ՀՀ նախագահ Սերժ Սարգսյանը:

Հիշեցնենք՝ Չմիավորման շարժումը (Non-Aligned Movement) ունի 118 անդամ-պետություն՝ հիմնականում Ասիայի և Աֆրիկայի երկրներից:
1961 թվականին շարժումը ստեղծվել է Հարավսլավիայի նախագահ Տիտոյի առաջարկով և հիմքում ունեցել է երկու նպատակ՝ գաղութատիրության դեմ պայքար և պայքար ռազմական դաշինքների դեմ: Շարժման անդամ պետությունները միավորվել էին նաև Սառը պատերազմի երկրների՝ ԱՄՆ-ի և Ռուսաստանի ազդեցության դեմ:

Ըստ որոշ փորձագետների՝ Խորհրդային Միության փլուզումից հետո Չմիավորման շարժումը սպառել է իրեն, թեև կազմակերպությունը վերաիմաստավորել է նպատակները և արդեն կենտրոնանացել գլոբալիզացիայի, առևտրի և ներդրումների, միջազգային ահաբեկչության և այլ խնդիրների վրա:

Ուշագրավ է, որ Չմիավորման շարժման հիմնական աշխատանքները կատարվում են ՄԱԿ-ի նյուրորքյան գրասենյակում՝ Միավորված Ազգերի կազմակերպությունում անդամ պետությունների դեսպանների կողմից: