Դատարանը Արմավիրի մարզպետի որոշումը անվավեր ճանաչելու հայցը վարույթ ընդունեց (տեսանյութ)

Վերջին օրերին Արմավիրի մարզի Եղեգնուտ համայնքում բնակիչները բահերով ու եղաններով բողոքի ակցիա են իրականացնում՝ ընդդեմ նախկին համայնքապետ Ռազմիկ Մարգարյանի: Վերաքննիչ դատարանը որոշում էր կայացրել, ըստ որի՝ նախկին համայնքապետը պետք է վերականգնվեր իր պաշտոնում, իսկ գյուղացիները` չէին ցանկանում:

Արմավիրի մարզպետ Համբարձում Մաթևոսյանը կազմել էր հանձնաժողով, որը համայնքում պետք է  իրականացներ հանձնման-ընդունման աշխատանքներ:

Քիչ առաջ ԼՈՒՐԵՐ.com-ը տեղեկացավ, որ Վարչական դատարանը Արմավիրի մարզպետ Համբարձում Մաթևոսյանի՝ վերոնշյալ որոշումը անվավեր ճանաչելու հայցը վարույթ ընդունեց: Դատը տեղի կունենա օգոստոսի 31-ին:

«Մեր իրավաբանական խմբի ղեկավարը տեղյակ պահեց, որ Վարչական դատարանից Ռազմիկ Մկրտչյանի հայցը՝ ընդդեմ Արմավիրի մարզպետի, ընդունվել է որպես վարույթ՝ մարզպետի որոշումը անվավեր ճանաչելու և համայնք հանձնաժողով ուղարկելու հետ կապված»,-ասաց «Հանուն ժողովրդի բարեկեցություն» ՀԿ նախագահ Այսեր Իսայանը: 

Ստացվում է՝ հանձնաժողովը այս պահին իրավունք չունի համայնքում որևէ աշխատանք իրականացնելու:

«Մարզպետը կայացրել էր որոշում՝ կազմել հանձնաժողով և ուղարկել համայնք, որպեսզի համայնքում իրականացնեն հանձնման-ընդունման աշխատանքներ: Ամեն օր եկել, տեսել են, որ դուռը փակ է, թողել, գնացել են: Այսօր առավոտյան էլ եկան, տարաձայնություններ եղան իրենց և բնակիչների միջև՝  համայնքի տարածքը ազատելու հետ կապված»,-նշեց Իսայանը և հավելեց՝ ամեն ինչ հանգիստ է, կրքերը երկկողմանի հանդարտվել են:

Հիշեցնենք, որ նախկին Ժ/Պ Ռազմիկ Մկրտչյանը  08.07.2020 հայցադիմում էր ներկայացրել ՀՀ վարչական դատարան՝ ընդդեմ Արմավիրի մարզպետ Համբարձում Մաթևոսյանի՝ խնդրելով  անվավեր ճանաչել մարզպետի որոշումը: