Առաջիկայում հանդիպումներ կլինեն Ռոբերտ Քոչարյանի և Սերժ Սարգսյանի հետ. Արթուր Վանեցյանը դուրս եկավ ԱԱԾ-ից

«Ինձ ԱԱԾ էին հրավիրել մի անհեթեթ գործի շրջանակներում՝ նյութերի նախապատրաստման շրջանաում բացատրություն տալու համար: Նշեմ՝ որևէ պարտավորություն չունեի գալու, բայց հարգելով ինստիտուտը` այցելել եմ, և հրաժարվել եմ բացատրություն ներկայացնելուց»,- ԱԱԾ-ից դուրս գալով՝ լրագրողների հետ զրույցում ասաց Արթուր Վանեցյանը:

«Այս գործը ոչնչի մասին է. հերթական շինծու և քաղաքական նպատակներ հետապնդող գործ է: Վերջին 8 ամիսների ընթացքում իշխանությունները ամեն կերպ փորձում են իմ նկատմամբ իրականացնել քաղաքական հետապնդում՝ նպատակ ունենալով կասեցնել իմ ակտիվ քաղաքական գործունեությունը: Շատ լավ գիտեք, որ իմ հասցեին հնչեցված մեղադրանքներից որևէ մեկը չի հաստատվել և ինչպես նրանք, այդպես էլ այս մեղադրանքը, հօդս է ցնդելու»,- ընդգծեց ԱԱԾ նախկին պետը:

Ըստ Վանեցյանի՝ 2018 թվականին վերականգնվել է աշխատանքի իրենց նախկին աշխատակիցներից մեկը, որը, ըստ ԱԱԾ մեկնաբանության, իրավունք չուներ վերականգնվելու. «ՀՀ քաղաքական ղեկավարությունը, ինչպես նաև այսօրվա ԱԱԾ գործող պետը երևի օրենքի ընթերցման և հասկանալու հետ կապված խնդիրներ ունեն»,- նշեց Վանեցյանը:

Վերջինս հայտարարեց՝ առաջիկայում լինելու են շատ ակտիվ քաղաքական գործընթացներ, որոնց ընթացքում մենք կտեսնեք այն զարգացումները, որոնք կլինեն. «Չի բացառվում, որ առաջիկայում հանդիպումներ կլինեն բոլոր քաղաքական ուժերի, անհատների, այդ թվում՝ Ռոբերտ Քոչարյանի և Սերժ Սարգսյանի հետ»:

«Իրականում երկիրը գտնվում է ծանրագույն իրավիճակում, իշխանությունները ձախողել են իրենց աշխատանքները, և այսօր դրանք կարգավորելու փոխարեն, իշխանությունները ընկած են իրենց քաղաքական ընդդիմախոսներին լռեցնելով»,- նկատեց Վանեցյանը և եզրափակեց. «Ինձ հարցաքննության հրավիրելու գործ էլ չկար, ուր մնաց կալանավորելու. գործը հարուցված չէ, նյութերի նախապատրաստում է»: