«Սա ծաղր է օրենքի նկատմամբ». հայտնի է՝ ինչ գործով է Վանեցյանը հրավիրվել ԱԱԾ

ԱԱԾ նախկին ղեկավար, «Հայրենիք» կուսակցության ղեկավար  Արթուր Վանեցյանը հրավիրվել է ԱԱԾ՝ բացատրություններ տալու:

Արթուր Վանեցյանի փաստաբանը՝ Լուսինե Սահակյանը, լրագրողների հետ զրույցում մանրամասները ներկայացրեց Արթուր Վանեցյանի գործի կապակցությամբ.  «Պրն. Վանեցյանը հրավիրվել էր բացատրություն տալու, նախապատրաստվում են նյութեր՝ աշխատակիցներից մեկին աշխատանքի վերականգնելու վերաբերյալ: Սա ես համարում եմ օրենքի նկատմամբ ծաղր, որովհետև գոյություն ունի օրենք, որտեղ ԱԱԾ ծառայողի համար սահմանային ժամկետ է համարվում 50 տարին, և նախկին աշխատակիցը իրավունք ունի վերականգնել իր աշխատանքը  5 տարվա ժամկետում, ինչը տվյալ ապարագայում արվել է, էստեղ 1 տարվա մասին է խոսքը, և անձը  աշխատանքի է վերականգնվել օրենքի պահպանմամբ»,- պարզաբանեց փաստաբանը:

Ըստ նրա՝ այստեղ խնդիրը այն չէ՝  օրենքը խախտվել է, թե ոչ, և նրանք օրենքը կարդացել են թե ոչ, և գիտեն արդյոք՝  օրենքում հստակ սահմանված է, որ մինչև 5 տարի ժամկետով կարող է երկարացվել նախկին աշխատակցի պաշտոնը. «Էստեղ խնդիրը այն է, որ քննարկվում է քրեական գործ հարուցելու հարցը, այսինքն՝  նյութեր են նախապատրաստվում: Ինձ համար շատ զարմանալի է էս հանգամանքը, որովհետև քրեական օրենսգրքում չկա նման նորմ, եթե նույնիսկ խախտում եղած լիներ, ու անձը 60 տարեկանում վերականգնված լիներ աշխատանքի համար, միևնույն է, սա քրեական պատասխանատվություն առաջացնել չի կարող: Արթուր Վանեցյանի դեմ չկա քրեական գործ հարուցելու որևէ հիմք: Նրանք արդեն հասել են նրան, որ նույնիսկ այս կերպ, փորձում են քրեական գործ հարուցել և մեղադրանք առաջադրել»,- ասաց Լուսինե Սահակյանը:

Լրագրողների այն հարցին՝ որ պաշտոնակատարի մասին է խոսքը, փաստաբանը չպատասխանեց՝ նշելով միայն, որ այդ մարդու աշխատանքի վերականգնման շնորհիվ մեծ թվով գումար է վերադարձել բյուջե:

«Եթե մենք այն աստիճանի հասնենք, որ քրեական գործ հարուցվի և լրիվ ծաղրեն օրենքը, չեմ բացառում, որ Արթուր Վանեցյանը նորից կհրավիրվի ԱԱԾ հնարավոր է՝ կարգավիճակ էլ ստանա, վերջին շրջանում ես ոչնչի վրա էլ չեմ զարմանում»,- նշեց փաստաբանը:

Լուսինե Սահակյանը այն կարծիքին է, որ սա քաղաքական հետապնդում է, և ոչ մի տրամաբանող մարդ այլ դիրքորոշում չի էլ կարող ունենալ: