Տարածում էին տարատեսակ կեղծ «սլիվներ», թե իբր նվերներ եմ ստացել, ավտոմեքենա, կոստյում եւ այլն․ Դավիթ Սանսարյան

Առողջապահության նախարար Արսեն Թորոսյանը որպես վկա պետք է գա Պետական վերահսկողական ծառայության պետ (լիազորությունները ժամանակավորապես կասեցված են) Դավիթ Սանասարյանի եւ մյուսների գործով դատավարությանը եւ նրան անկնկալ հարցեր կան, որոնց ինքը չի սպասում։ Այս մասին այսօր՝ օգոստոսի 10-ին, դատական նիստի ընդմիջմանը լրագրողների հետ զրույցում ասաց Դավիթ Սանասարյանը։

Խոսելով դատական նիստին ուսումնասիրված գործով առկա փաստաթղթերի, ինչպես նաեւ նամակագրության մասին՝ Սանասարյանն ասաց. «Այդ կառույցը փորձեց ինչ-որ բան գտնել իմ հետ կապված, սակայն չկարողացավ գտնել։ Տարածում էին տարատեսակ կեղծ սլիվներ, թե իբր Սանասարյանը նվերներ է ստացել, ավտոմեքենա, կոստյում եւ այլն։ Կառույցն էլ պատասխանեց, որ այդպիսի բան տեղի չի ունեցել»։

Անդրադառնալով Կոռուպցիայի կանխարգելման հանձնաժողովում Արսեն Թորոսյանի նկատմամբ վարույթ հարուցելուն, Սանասարյանն ասաց. «Սրա մասին ես վաղուց ասել եմ, ասել եմ, որ սա անընդունելի է։ Եթե լիազորություններս դադարեցված չլինեին, աշխատակիցներիս կհանձնարարեի, չէի թողնի Կոռուպցիայի կանխարգելման հանձնաժողովին, ուսումնասիրել եւ տեսնել՝ այդ ինչպե՞ս ստացվեց, որ ինքը նախարար է եւ առանց մրցույթ հայտարարելու, մոտ 170 միլիոնի գործարք է կնքում մի բժշկական կենտրոնի հետ, որի ղեկավարն իր կինն է. այստեղ Դատախազությունն էլ անելիք ունի, ԱԱԾ-ն ունի անելիք»։

Անդրադառնալով ներկա ներքին քաղաքական իրադարձություններին՝ մասնավորապես, Արթուր Վանեցյանի ակտիվացմանը, Սանասարյանն ասաց․ «Քաղաքականության մեջ մի կարևոր սկզբունք կա, դա սկզբունք ունենալն է, խորհուրդ կտամ այդ սկզբունքը պահել։ Եթե մարդն առաջ հայտարարում էր, որ Սերժ Սարգսյանը, Ռոբերտ Քոչարյանը կոռուպցիոներներ են, հետո ասում է կհամագործակցեմ նրանց հետ, ուրեմն այդ մարդը խնդիր ունի ժողովրդի հետ»։

Հիշեցնենք, որ Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով` պաշտոնեական լիազորությունները չարաշահելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը: Հիշեցնենք՝ քրեական գործով անցնում է 4 մեղադրյալ։ Սանասարյանից բացի, քրեական գործով ամբաստանվում են նաեւ ՊՎԾ եւս երկու աշխատակից՝ Գեւորգ Խաչատրյանը, Սամվել Ադյանը եւ վերջինիս ընկերը՝ «Զորաշեն» ՍՊԸ-ի փաստացի ղեկավար Տարոն Ավետիսյանը։