Կալանքը կարող է Էդգար Մալաքյանի կարիերայի վերջը տալ. պաշտպան

Ինչպես արդեն տեղեկացրել ենք, Երևանի ընդհանուր իրավասության դատարանը բավարարել է ֆուտբոլիստ Էդգար Մալաքյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Էդգար Մալաքյանի պաշտպան Գոռ Միքայելյանը ԼՈՒՐԵՐ.com-ին հայտնեց, որ դատարանի որոշումը կբողոքարկի Վերաքննիչ քրեական դատարանում։ 

Միքայելյանը նշում է՝ արդյոք այդ խոչընդոտելու հավանականությունն այնքան մեծ էր, որ կարելի՞ էր ֆուտբոլիստի կարիերային վերջ տալ․ «Մեկամյսա կալանքը կարող է ֆուտբոլիստի համար ճակատրագրական լինել։ Հայաստանն էլ այնքան ֆուտբոլիստ չուներ, որ կարող էր այս ենթադրյալ հանգամանքի համար կալանքի տակ վերցնել»։

«Քննիչը ներկայացրել է օրենսգրքով նախատեսված կալանավորելու գրեթե բոլոր հիմքերը. կթաքնվի քննությունից, կխոչընդոտի քննությանը, նոր հանցանք կկատարի, կխուսափի պատժից ու պատասխանատվությունից։ Դատարանը բոլորի հիմքերից համարել է, որ առկա է քննությանը խոչընդոտելը։ Դատարանն էլ այդ հիմքն այնքան էլ մեծ չի համարել, այդ պատճառով կալանքի ժամկետը սահմանել է մեկ ամիս։ Այնպես չէ, որ, եթե Էդգար Մալաքյանը մնար ազատության մեջ՝ ինչ-որ մեկին ասելու էր, որ ինչ-որ ցուցմունք տա։ Ամեն դեպքում, ես չեմ կարծում, որ կալանքն էր այդ հավանականության ռիսկից հետ պահողը»,- ընդգծեց պաշտպանը։

Հիշեցնենք, որ Երևանի ընդհանուր իրավասության դատարանը մերժել է ֆուտբոլիստ Գոռ Մալաքյանին կալանավորելու վերաբերյալ քննիչի միջնորդությունը։

Նշենք, որ Ֆուտբոլիստ եղբայրներին մեղադրանք է առաջադրվել՝ ՀՀ ՔՕ 316-րդ հոդվածի (իշխանության ներկայացուցչի նկատմամբ բռնություն գործադրելը) 1-ին մասով եւ 258-րդ հոդվածի (խուլիգանություն) 3-րդ մասի 1-ին եւ 2-րդ կետերով:

Արփինե Հակոբյան