Կովկասի սև շաբաթը. Թոմաս դե Վաալ

«Շատ ահավոր շաբաթ ստացվեց բոլոր նրանց համար, ովքեր Հայաստանի և Ադրբեջանի միջև երկարատև կոնֆլիկտի խաղաղ լուծման հույս ունեն:-Ըստ BBC-ի հաղորդման` այսպես է բնութագրում վերջին իրադարձությունները բրիտանացի լրագրող Թոմաս դե Վաալը, ապա շարունակում.

Ադրբեջանի նախագահ Իլհամ Ալիևը սադրիչ քայլ արեց՝ ներում շնորհելով Ռամիլ Սաֆարովին, ով դատապարտվել էր ցմահ ազատազրկման Գուրգեն Մարգարյանին կացնահարելու համար։

Հայաստանում հայ սպայի թաղումը վերածվեց պաշտոնական մակարդակի իրադարձության, մինչդեռ Ադրբեջանում խորհրդարանի որոշ անդամներ համարձակվեցին Սաֆարովին անվանել հերոս։

Բայց ութ տարի անց իրավիճակը կտրուկ փոխվեց. մեզ դեռևս անհայտ պատճառներով Հունգարիայի կառավարությունը համաձայնվեց արտահանձնել Սաֆարովին Բաքու' երկու երկրների կողմից ստորագրված կոնվենցիայի համաձայն։

Հերիք չի Սաֆարովին ներում շնորհվեց, նրան նաև դարձրեցին հերոս. Սաֆարովին տրամադրեցին բնակարան Բաքվում և տվեցին մայորի կոչում»։

Անդրադառնալով միջազգային արձագանքին՝ Թոմաս դե Վաալը առանձնացնում է ԱՄՆ-ի և Ռուսաստանի պաշտոնական կոշտ դիրքորոշումները։

Եվրոպական խորհրդի արտաքին քաղաքականության հարցերով բարձր ներկայացուցիչ Քեթրին Էշթոնը ևս անհանգստություն արտահայտեց այս հարցի շուրջ՝ ձեռնպահ մնալով ուղիղ մեղադրանքից. Եվրոպական խորհրդի մոտ առանց այն էլ խնդիրները շատ են' վարչապետ Օրբանի և նրա վարած քաղաքականության հետ կապված։

Ինչ վերաբերում է Հայաստանին, ապա այն կարծես հասել է «եռման կետի»։ Երևանը կասեցրեց դիվանագիտական հարաբերությունները Հունգարիայի հետ։

Նկարագրելով Ադրբեջանի քաղաքականությունը՝ Բաքուն ծախսել է միլիոնավոր նավթային դոլլարներ՝ փորձելով ներկայացնել Ադրբեջանը դինամիկ զարգացող և ժամանակակից երկիր։ Սակայն մարդասպանին նման ընդունելություն ցույց տալուց հետո երկրի հեղինակությանը հասցվեց ահռելի վնաս։

Եթե կա ինչ-որ դրական բան, դա այն է, որ միջազգային հանրությունը հավանաբար ավելի շատ ուշադրություն կդարձնի Հայաստանի և Ադրբեջանի միջև նոր կոնֆլիկտի վտանգին Լեռնային Ղարաբաղի համար»։