Ռասմուսենի ուղերձը Հարավային Կովկասի երկրներին

ՆԱՏՕ-ի գլխավոր քարտուղար Անդերս Ֆոգ Ռասմուսսենը facebook սոցցանցի իր էջում տեղադրել է տեսաուղերձ ուղղված Հարավային Կովկասի երկրներին: Ստորև ներկայացնում ենք այն.

«Հարավային Կովկասը կարևոր է Հյուսիսատլանտյան դաշինքի համար: ՆԱՏՕ-ն գնահատում է համագործակցությունը այս տարածաշրջանում ապրող բոլոր երկրների հետ և նրանց աջակցությունը. առաջին հերթին նրանց զորքերը Աֆղանստանում և Կոսովոյում, ինչպես նաև ֆինանսական աջակցությունը, ուսումնական և տրանզիտային պայմանգրերը:

ՆԱՏՕ-ն աջակցում է Վրաստանին, Հայաստանին և Ադրբեջանին պաշտպանական և անվտանգության ոլորտի բարեփոխումներով: Մենք քաջալերում ենք մեր գործընկերներին շարունակել բարեփոխումները: Միասին ցանկանում ենք բարձրացնել կայունությունը այս տարածաշրջանում և նպաստել պաշտպանության, ազատության և մարդու իրավունքների ամրապնդմանը:

Հարավային Կովկասն ունի մեծ տնտեսական ներուժ: Բայց այդ ներուժը արգելափակված է չլուծված հակամարտությունների պատճառով:
Լարվածությունը այս տարածաշրջանում պետք է նվազեցնել և հստակ քայլեր պետք է ձեռնարկվեն՝ նպաստելու տարածաշրջանային համագործակցությանը և հաշտեցմանը:

Այսպիսով, ՆԱՏՕ-ն և մեր գործընկերները այստեղ Հարավային Կովկասում ունեն ամուր հիմքեր երկխոսության և համագործակցության համար: Միասին մենք կարող ենք գործ ունենալ 21-րդ դարի անվտանգության մարտահրավերների հետ, մենք կարող ենք աշխատել միասին՝ ստեղծելու կայունություն, անվտանգություն և բարգավաճում, ինչին այս տարածաշրջանն արժանի է: