ԱՄՆ դեսպան. Ադրբեջանի անվտանգությանը հիմնականում սպառնում է Իրանը

Trend ադրբեջանական գործակալության փոխանցմամբ՝ Ադրբեջանում ԱՄՆ-ի նորանշանակ դեսպան Ռիչարդ Մորնինգսթարը լրագրողների հետ զրույցում հայտարարել է, որ Ադրբեջանի անվտանգությանը հիմնականում սպառնում է Իրանը։ «Մենք միշտ շատ սերտ աշխատել ու շարունակում ենք աշխատել ադրբեջանական ղեկավարության հետ՝ այդ հարցով»,- հայտարարել է նա:

Դեսպանն արձագանքել է նաև վերջերս կոնգրեսմեն Դանա Ռոռոբախերի հայտարարությանը, ըստ որի, պետք է մասնատել Իրանն ու միավորել «Հյուսիսային» ու «Հարավային» Ադրբեջանները։ «Ռոռոբախերը միշտ էլ հանդես է գալիս հետաքրքիր առաջարկներով, սակայն այն չի համապատասխանում պաշտոնական ԱՄՆ-ի դիրքորոշմանը»,- հայտարարել է նա:

Նշենք նաև, որ կոնգրեսմեն Ռոռոբախերն օգոստոսի վերջին հանդես էր եկել ԱՄՆ պետքարտուղար Հիլարի Քլինթոնին ուղղված առաջարկով՝ աջակցել «Հարավային Ադրբեջանի» անկախությանը և Ադրբեջանական Հանրապետության «միավորման» հնարավորությանը (խոսքն իրանական Ատրպատականի մասին է)։