Փորձագետ. Թուրքիան դառնալու է հակաիրանական ագրեսիայի անուղղակի զոհը

Իրանի և Թուրքիայի տարածաշրջանային հակամարտությունը կարող է վերաճել ռազմական առերեսման։ Այս մասին ասել է Ռուսաստանի գիտությունների ակադեմիայի միջազգային հարաբերությունների և համաշխարհային տնտեսության ինստիտուտի գիտական աշխատակից, թուրքագետ, քաղաքագետ Վիկտոր Նադեին-Ռաևսկին. գրում է Regnum գործակալությունը։

Ըստ նրա՝ Թուրքիայի և Իրանի հակամարտությունը պայմանավորված է պատմական գործոններով. «Վաղուց ի վեր երկու պետությունները տարբեր ճամբարներում են գտնվել, նրանցից յուրաքնչյուրը տարածաշրջանում իր շահերն է հետապնդել, ինչը բերել է տարաձայնությունների։ Պետք է ընդունել, որ ժամանակակից Թուրքիայի իշխանությունները քայլեր ձեռնարկել են սուր անկյունները հարթելու ուղղությամբ, բայց դրանք ձախողվել են։ Նման քայլերի վառ օրինակ է Թուրքիայի միջնորդության առաջարկը Իրանի և Արևմուտքի միջև Իրանի միջուկային ծրագրի պատճառով առաջացած հարցում»:

Ինչ վերաբերում է մոտ ապագայում Թուրքիայի նկատմամբ Իրանի հարձակմանը, Նադեին-Ռաևսկին ընդգծել է, որ չնայած նման սպանալիքներ Իրանի կողմից հաճախ են հնչեցվում, սակայն պետք է հիշել, որ Իրանի Իսլամական Հանրապետության իշխանությունները կարողանում են հավասարակշռել սպառնալիքները և իրական գործողությունները։

«Իրանական իշխանությունները բարդ իրադրության մեջ են. Պարսից ծոցի միապետությունները, Իսրայելը, ԱՄՆ-ը, սիրիական հարցը, արևմտյան պատժամիջոցները, Անկարայի հետ տարաձայնությունները, բոլորը լուրջ խնդիրներ են, որոնց հետ բախվել է այս պետությունը։ Պատժամիջոցները քայքայում են Իրանի ներքին քաղաքականության սոցիալական բաղադրիչը, իսկ այդ հարավային ազգը գիտի արտահայտել իր դժգոհությունը։ Համենայն դեպս, իրանական իշխանություններից չարժե սուր և չմտածված քայլեր ակնկալել»,- ասել է փորձագետը, ավելացնելով, որ Թուրքիան իր հերթին նման քայլերի չի դիմի։