Եթե Կովկասը ժայթքի, պատերազմ կծագի. Reuters

Ադրբեջանը դիմում է Լեռնային Ղարաբաղը ետ վերցնելու սպառնալիքների, իսկ նրա որոշումը՝ հերոսի պես դիմավորել հայազգի սպային կացնահարած ադրբեջանցի զինվորին, մեծացրել է պատերազմի ծագման վտանգը, որի մեջ կարող են ներգրավվել Թուրքիան, Ռուսաստանը և Իրանը, գրում է Reuters-ը։

Ներկայումս Հայաստանը և Ադրբեջանը ավելի հզոր զենքեր ունեն, քան երկու տասնամյակ առաջ, և եթե ադրբեջանական գազը Թուրքիայով Եվրոպա հասցնող գազատարներին կամ Հայաստանի ատոմակայանին վտանգ սպառնա, պատերազմ կարող է ծագել։

Հայաստանը հավաքական անվտանգության պայմանագիր ունի իր տարածաշրջանային դաշնակից Ռուսաստանի հետ, մինչդեռ Ադրբեջանը նմանատիպ պայմանագիր ունի Թուրքիայի հետ, որը ՆԱՏՕ-ի անդամ է, և որի շրջանակներում հարձակումը անդամներից որևէ մեկի նկատմամբ դիտարկվում է որպես հարձակում բոլոր 28 անդամների դեմ։

Թոմաս դե Վաալը՝ Կարնեգի հիմնադրամի Կովկասի փորձագետը, կարծում է, որ ներկայումս պատերազմը շատ ավելի կործանիչ կլինի, քան 1990-ականներին էր։ «Դա շատ ավելի արյունալի բնույթ կունենա և լայնածավալ, պետությունն ընդդեմ պետության կոնֆլիկտի կվերածվի՝ անկանխատեսելի հետևանքներով»։

«Մենք կարծում ենք, որ եթե ընդհարումները շարունակվեն, դրանք չեն պարփակվի տարածաշրջանային սահմանների մեջ։ Կարծում եմ՝ այդ ընդհարումները ավելի լայն աշխարհագրական տարածում կունենան»,- ասել է Լեռնային Ղարաբաղի նախագահ Բակո Սահակյանը։

Նշենք, որ Եվրոպայի անվտանգության և համագործակցության կազմակերպության ջաներն այս ուղղությամբ քիչ արդյունքներ են տվել։
«Լեռնային Ղարաբաղը Հայաստանի անքակտելի մասն է։ Մենք ամեն ինչ կանենք՝ փրկելու համար մեր հողերը»,- ասել է արքեպիսկոպոս Պարգև Մարտիրոսյանը։