Գարնանը թուրքերը մարդաորս են սկսելու. Շուռնուխի համայնքապետ

Ինչպես քիչ առաջ հայտնեցինք, այսօր կառավարության նիստում որոշում ընդունվեց Շուռնուխում նոր թաղամաս կառուցելու համար հատկացնել 470 մլն դրամ: ԼՈՒՐԵՐ.com-ը այս թեմայով զրուցելու համար կապ հաստատեց Շուռնուխի համայնքապետի՝ Հակոբ Արշակյանի հետ, որն ասաց՝ առանձնապես հույս չի կապում կառավարության հետ, միայն մեկին է վստահում. «Եթե կարողանան կազմակերպել ու շնորհքով վերջնական ավարտին հասցնեն այդ թաղամասը՝ իր 12 տներով՝ այն, ինչ խոստացել է կառավարությունը, շատ լավ կլինի: Գյուղացին ոչինչ չի ուզում իշխանությունից, անգամ դրամական աջակցություն։ Նա իր տունն է ուզում: Այնպես չէ, որ իմ վստահությունը Կառավարության հանդեպ կրկնապատկվել է կամ եռապատկվել: Ես հավատում եմ միայն հանձնաժողովի ղեկավարին՝ Ռոբերտ Ղուկասյանին: Ես հավատում եմ այս տղային, ոչ թե Կառավարությանը»,- նշեց Շուռնուխի համայնքապետը:

Մենք հետաքրքրվեցինք նաև, թե ինչ տրամադրություն է տիրում բնակչության շրջանում։ Կա՞ արդյոք խուճապ։ Համայնքապետը պատասխանեց, որ որևէ փոփոխություն իրենց մոտ չկա. «Բնակչության մոտ ստաբիլ նույն լարված իրավիճակը պահպանվում է, որևէ փոփոխություն չկա մեզ մոտ: Ժողովուրդը հուսալքված է, արդեն վերաբնակեցված ճանապարհի վերևում մեր երեխեքն են, իսկ ճանապարհի ներքևում թուրքն է։ Այս խնդիրն է, որ չի կարգավորվում»,- ասաց համայնքապետը: 

Նա ասաց, որ թշնամու հետ միևնույն տարածքում գտնվելու հետևանքով՝ չի բացառում ոչինչ․ նրանք պատրաստ են ամեն ինչի. «Հնարավոր է՝ դու ճանապարհը անցնելիս լինես, ու քեզ թուրքը կանգնացնի, 4 մատ ցույց տա, ասի՝ դե գնա: Հենց գարունը գա, ու ծառերը սկսեն կանաչել, երկկողմանի անտառի այդ հատվածում հնարավոր է՝ թուրքերը մարդաորս սկսեն, դա եղել է նաև 1992 թվականին»,- նշեց Հակոբ Արշակյանը:

Համայնքապետը հավելեց, որ թշնամին միտք ունի պարբերաբար առաջ գալու. «Ախորժակը ուտելիս է բացվում, դրանք էլ ունեն այդ հատկությունը: Եթե նորից մի հատված տանք, իրենք էլի ու էլի նոր տարածքներ են ուզելու: Նրանք արդեն ամբողջ Հայաստանը իրենցն են համարում, բայց սա վերջն է․ կամ կգան կասեն՝ ինքնասպան էղի, կամ ճակատիդ կփորագրեն իրենց ուզածը։ Ոչ թե կգրեն, այլ կփորագրեն»,- եզրափակեց համայնքապետը:

Զվարթ Պետրոսյան