Շիկահողում կրակոցներ լսվում են օրվա տարբեր ժամերին. համայնքապետն ահազանգում է՝ հնարավոր է գյուղը դատարկվի

Շիկահողում կրակոցներ լսվում են օրվա տարբեր ժամերին, հիմնականում, ավելի ակտիվ է լինում գիշերը՝ 24։00-ից հետո: Կոնկրետ այս պահին կրակոցներ չկան: Այս մասին ԼՈՒՐԵՐ.com-ի հետ զրույցում ասաց Կապան խոշորացված համայնքի Շիկահող գյուղի վարչական ղեկավար Նարե Ղազարյանը:

Թշնամու կողմից Կապան համայնքի գյուղերի անմիջական հարևանությամբ գտնվող ադրբեջանական զինված ծառայողները մանր ու խոշոր տրամաչափի զինատեսակներից պարբերաբար՝ անկանոն կրակոցներ են արձակում։ Ղազարյանն ասում է, որ յուրաքանչյուր կրակոց խուճապ է առաջացնում, սակայն իրենք փորձում են հնարավորինս հանգիստ վերաբերվել:

«Միշտ չէ, որ դա ստացվում է և քանի որ պարբերաբար շարունակվում է՝ արդեն նորմալ չէ: Թշնամին այդկերպ փորձում է իր դիրքերն առաջ բերել, երևի մտածում է, որ, պարբերաբար կրակելով, մարդկանց մոտ խուճապ և վախ են առաջացնում, իրենք էլ ուզում են վախեցնել հայ սահմանապահներին, որպեսզի վերջիններս լքեն դիրքերը, ու մի քանի մետր էլ կարողանան կորզել մնացած տարածքներից»,- ընդգծեց Շիկահողի ղեկավարը:

Շիկահողի սահմանագիծը Ադրբեջանի հետ հստակ, մեկ գծով չի նշվել: Ադրբեջանական զորքերը՝ 1-5 կմ հեռավորության վրա տարբեր կետերում են տեղակայվել։ Հատվածներ կան, որ ընդհանրապես սահմանագիծ չունեն։

Ղազարյանը մտահոգված է՝ եթե այսպես շարունակվի՝ գյուղը կսկսի դատարկվել. «Այս հարցին վերջնական լուծում է պետք, մենք էլ պետք է վստահ լինենք, որ ամեն ինչ նորմալ է: Մենք թշնամուց մի քանի կիլոմետր ենք հեռու, բայց դա էլ իրավիճակը չի փրկում, քանի որ ունենք բազմազավակ ծնողներ, ովքեր գտնում են, որ իրենց երեխաների կյանքը վտանգված է: Եթե մենք մնում ենք և ցույց ենք տալիս, որ ամեն բան նորմալ է, փորձում ենք բնականոն կյանք վարել, բնականաբար, երեխաների շրջանում դա հնարավոր չէ, ծնողներին մեղադրելն էլ ճիշտ չէ, որովհետև վերջիններս իրենց երեխաների անվտանգության մասին են մտածում»:

Ներկայումս Շիկահողի ճանապարհի երկու հատվածում տեղակայվել են ռուս խաղաղապահներ, և բնակիչները նրանց աջակցությամբ են տեղաշարժվում, բայց երաշխիքներ չկան, որ այլ հատվածներում միջադեպեր չեն լինի։ Եթե թշնամին տեղակայվի ճամփեզրին՝ գյուղի բնակիչները Մեղրիով պետք է գան Կապան՝ 130 կմ-ով երկարացնելով ճանապարհը։

«Կառավարության ներկայացուցիչներն իրավիճակին ի՞նչ լուծում պետք է տան, սա մեծամասշտաբ խնդիր է, որին նրանք միջազգային լուծում պետք է տան: Դա մեզ հետ կապ չունի, մենք ներկայացնում ենք մեր խնդիրը, բայց դրան լուծում տալը մեզնից կախված չէ: Կառավարությունը պետք է աշխատանքներ տանի միջազգային մասշտաբներով, որպեսզի լուծվեն այս խնդիրները»,- եզրափակեց Ղազարյանը:

Արփինե Հակոբյան