Էդգար Ղազարյանն ընդդեմ ՍԴ նախագահի գործով դատական նիստը կկայանա վաղը

ՍԴ աշխատակազմի նախկին ղեկավար Էդգար Ղազարյանն ընդդեմ ՍԴ նախագահ Արման Դիլանյանի գործով դատական նիստը կկայանա վաղը՝ ժամը 10։30-ին։ Այս մասին տեղեկանում ենք Էդգար Ղազարյանի ֆեյսբուքյան էջից։

«2021 թվականի մարտի 16-ին, ժամը 10.30-ին ՀՀ վարչական դատարանի (ք․Երևան, Գ․Նժդեհի 23 հասցեում) թիվ 19 նիստերի դահլիճում, դատավոր Արթուր Ավագյանի նախագահությամբ տեղի կունենա իմ կողմից ներկայացված հայցադիմումի դատաքննությունը, որով ես վիճարկում եմ Արման Դիլանյանի, որպես ՍԴ նախագահի, պաշտոնավարման լեգիտիմությունը, ինչպես նաև, որպես դրա հետևանք, նրա կողմից` ինձ Սահմանադրական դատարանի աշխատակազմի ղեկավարի պաշտոնից ազատելու որոշման օրինականությունը։
Գործով հետաքրքրվող անձինք և լրագրողները կարող են ներկա լինել դատաքննությանը և լուսաբանել այն։

Վիճարկվող հայցում իմ անձնական գործոնը կրում է ոչ առաջնային բնույթ։ Ինձ համար կարևորն այն է, որ առաջին անգամ դատարանում քննության առարկա է ներկայացվելու 2020 թվականին ՀՀ Ազգային ժողովի քաղաքական մեծամասնության կողմից իրականացված հակասահմանադրական ճանապարհով սահմանադրական փոփոխությունների իրականացման և դրա հետևանքների վերացման ու իրավական գնահատական տալու հարցը։ Ակնհայտ է, որ դատարանում հնչելու են հանցագործությունների մասին հաղորդումներ, որոնք պետք է ունեն իրավական հետևանքներ։

Այս գործի շրջանակներում ինձ մասնագիտական աջակցություն է ցուցաբերում «Եղիազարյան և գործընկերներ» իրավաբանական ընկերությունը»,- գրել է Ղազարյանը։