«Գագիկ Սողոմոնյան» ֆեյքի գործով նախնական կալանքի տակ գտնվող Արամ Սարգսյանն ազատ արձակվեց. կալանավորումը ոչ իրավաչափ է եղել

«Գագիկ Սողոմոնյան» ֆեյքի գործով նախնական կալանքի տակ գտնվող Արամ Լևոնի Սարգսյանն ազատ կարձակվի։ Այս մասին ԼՈՒՐԵՐ.com-ին հայտնեց Սարգսյանի պաշտպան Բենիկ Գալստյանը:

Վերաքննիչ քրեական դատարանը՝ դատավոր Լուսինե Աբգարյանի նախագահությամբ, բավարարել է Սարգսյանին կալանավորելու որոշման դեմ պաշտպանի բողոքը՝ արձանագրելով, որ Սարգսյանի ձերբակալությունը և նրա նկատմամբ կալանավորումը որպես խափանման միջոց ընտրելու մասին առաջին ատյանի դատարանի որոշումը եղել է ոչ իրավաչափ։

Պաշտպանը հայտնեց, որ այժմ գնում է քրեակատարողական հիմնարկ՝ դատարանի որոշումը փոխանցելու համար։

Հիշեցնենք, որ փետրվարի 21-ի գիշերը Երևանի ընդհանուր իրավասության դատարանը՝ դատավոր Վահագն Մելիքյանի նախագահությամբ, բավարարել է Արամ Սարգսյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։

Դատարանը, միևնույն ժամանակ, մերժել է Սարգսյանին ձերբակալելու որոշման դեմ պաշտպանի բողոքը։

Հիշեցնենք նաև, որ Ազգային անվտանգության ծառայությունը ձերբակալել էր Ազգային ժողովի աշխատակազմի նախկին ղեկավար Արա Սաղաթելյանին, «Քառյակ մեդիա»-ի համահիմնադիր Կարեն Բեքարյանին եւ «Պառլամենտարիզմի զարգացման միջազգային կենտրոն» հասարակական կազմակերպության գրասենյակի մենեջեր Մհեր Ավագյանին եւ քաղաքացի Արամ Սարգսյանին:

Նրանց մեղադրանք է առաջադրվել ՀՀ քրեական օրենսգրքի 226-րդ (կազմակերպված խմբի կողմից ազգային, ռասայական կամ կրոնական թշնամանք հարուցելը), 226.2 -րդ (կազմակերպված խմբի կողմից բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը), 307.4-րդ հոդվածների (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հատկանիշներով:

Արա Սաղաթելյանը եւ Արամ Սարգսյանը դատարանի որոշմամբ կալանավորվել էին, իսկ Կարեն Բեքարյանը եւ Մհեր Ավագյանն ազատ արձակվել։

Այնուհետեւ պաշտպանները բողոքարկել էին Արա Սաղաթելյանին կալանավորելու մասին որոշումը. ՀՀ վերաքննիչ դատարանն Արա Սաղաթելյանին ազատ արձակելու որոշում էր կայացրել։