Ոստիկաններին ցույցերի ու հավաքների վայրեր տեղափոխող ավտոբուսների համար ծախսվել է 57 մլն 726 հազար դրամ

ՀՀ վարչապետ Նիկոլ Փաշինյանի կողմից նոյեմբերի 9-ի լույս 10-ի գիշերը ղարաբաղյան պատերազմը դադարեցնելու մասին հայտարարությունը ստորագրելուց հետո Հայաստանի տարբեր մասերում և Երևանում սկսեցին հավաքներն ու ցույցերը։ Շուրջ 4 ամիս տևող իրադարձություններին մասնակից են դառնում նաև ոստիկանները, որոնք իրենց աշխատանքային պարտականություններն են կատարում՝ հետևելով կարգուկանոնին։ Ուշագրավ է, որ հավաքների վայր կամ հակառակ ուղղությամբ ոստիկանական խմբերը տեղափոխվում են տուրիստական ընկերությունների ավտոբուսներով։ Թե ոստիկանությունն այս ամիսներին որքա՞ն գումար է ծախսել տուրիստական ընկերությունների մեքենաների համար և ո՞ր տուրիստական ընկերություններն են համագործակցում ոստիկանության հետ՝ աշխատակիցներին տեղափոխող մեքենաներ տրամադրելու համար՝ պարզեցինք Ոստիկանությունից։

ԼՈՒՐԵՐ․com-ի հարցմանն ի պատասխան` Ոստիկանությունից տեղեկացրել են, որ նոյեմբերից առ այսօր նշված ծառայությունները մատուցում է «ԷԼԻԲԱՍ» ՍՊԸ-ն, իսկ ուղևորափոխադրող ավտոմեքենաների վարձակալության համար վճարվել է 57 միլիոն 726 հազար դրամ։

«ՀՀ ոստիկանության յուրաքանչյուր տարվա բյուջեով հատկացումներ են նախատեսվում նաև ուղևորափոխադրող ավտոմեքենաների վարձակալության ծառայություններ ձեռք բերելու նպատակով։ Նշված միջոցների սահմաններում, օրենսդրությամբ սահմանված ընթացակարգով կնքված պայմանագրերի հիման վրա 2020 թվականի նոյեմբերից առ այսօր նշված ծառայությունները մատուցում է «ԷԼԻԲԱՍ» ՍՊԸ-ն։ 2020 թվականի նոյեմբերից մինչև ս.թ. մարտի 16-ն ընկած ժամանակահատվածում, հավաքների և ցույցների ժամանակ հասարակական կարգը և հասարակական անվտանգությունն ապահովող ոստիկանական ուժերի տեղաշարժն ապահովելու նպատակով ուղևորափոխադրող ավտոմեքենաների վարձակալության համար, ըստ պայմանագրերով սահմանված՝ նստատեղերի քանակի, 1կմ-ի և 1 ժամի սակագների հաշվարկով վճարվել է 57.726.0 հազ. դրամ»,- նշել են Ոստիկանությունից։

Նշենք, որ «Էլիտ Բաս» ընկերության տնօրենը Գուրգեն Նիկողոսյանն է, ում պատկանող ընկերությունն իր ծառայություններն է մատուցել նաև նախկին իշխանությունների օրոք։

Սոնա Հարությունյան