«Խոստանում եմ՝ անձամբ Հայկ Մարությանը կգա կոյուղագիծը բացելու, մաքրելու և այդ աշխատանքները վերահսկելու». Սարյանի բնակիչները ահազանգում են

Երևանի արվեստանոցներից մեկում արդեն 10-15 օր է, ինչ շարունակվում է կոյուղաջրերի հոսքը: Արվեստանոցը գտնվում է քաղաքի կենտրոնում՝ Սարյան փողոցում։ Քաղաքացիները ահազանգում են՝ ընդգծելով, որ պատկան մարմինները այդ օրերի ընթացքում խնդիրը վերացնելու համար որևէ պարտավորություն չեն վերցրել իրենց վրա. «Շենքի կոյուղագիծը խցանված և վնասված է, 10-15 օր շարունակ դիմում ենք համապատասխան բոլոր պատկան մարմիններին և հասկանում ենք, որ  տոտալ անգործություն է տիրում, այն դեպքում, երբ համատիրրությունը իր գումարը հավաքելիս լավ հավաքում է: Տվյալ խնդիրը ներկայացնելիս բոլորն իրենց ներկայացնում են անկախ մարմին»,- նշեց արվեստանոցի տիրոջ՝ Արշավիր Կիրակոսյանի որդին՝ Հայկ Կիրակոսյանը:

Նա մեզ հետ զրույցում կես կատակ-կես լուրջ ասաց. «Ես արդեն երկրի իրավիճակը ներկայացնելիս ասում եմ՝ համեցե՛ք արվեստանոց և երկրի ամբողջ իրավիճակը կտեսնեք՝ մի կողմից երկրի հնագույն մշակութային արժեքներն են, մյուս կողմից՝ այն կեղտը, որը  լցվել է փողոցները, երկիրը և պետական ապարատը»,- ընդգծեց նա: 

Մեր այն հարցին, թե պատկան մարմիններին դիմելիս ինչ պատասխան են ստացել, վերջինս ասաց. «Որևէ արձագանք չենք ստացել, նրանց  արձագանքը միայն եղել է այն, որ «պրովուլկայով» մի խեղճ ու կրակ մարդու են ուղարկում, որը գալիս է, բացում խցանումը, և խնդիրը 2 ժամ հետո նորից կրկնվում է, քանի որ խողովակն է վնասված, որը պետք է փոխվի»,- ասաց Հայկ Կիրակոսյանը:

Վերջինս ասաց, որ իրենց խնդիրը նորից անտեսելու դեպքում ստիպված պետք է արվեստանոցից կոյուղագծերը փակի, ինչի հետևանքով այն կբարձրանա և կլցվի իրենց վերևի հարևանի տուն. «Այլևս թույլ չեմ տալու, որ հայրիկիս աշխատանքները փչանան: Ստիպված ջրազրկումներ ենք անում, շենքի ջուրն ենք անջատում և այլն: Մեր կողմից որևէ աշխատանք անելու դեպքում էլ պետք է քաղաքապետարանի թույլտվությունը, որ ասֆալտը փորվի 3 մետր խորությամբ, որ նոր խնդիրը կարողանանք կարգավորել»,- ասաց մեր զրուցակիցը՝ հավելելով. «Եթե այսպես շարունակվեց՝ ես տեղում՝ կոյուղաջրերի հոսքի ներքո, մամուլի ասուլիս կանեմ, և լրատվամիջոցները կտեսնեն քաղաքապետարանի, մշակույթի նախարարության և կառավարության իրական դեմքը»:

Հայկ Կիրակոսյանի խոսքերով՝ նա իր տեսակով սպասող մարդ չէ, և ավելի հավանական համարեց քաղաքապետի՝ Հայկ Մարությանի՝ կոյուղին մաքրելը, քան իր սպասելը. «Հայաստանում ապրող ամենահետևողական մարդկանցից մեկն եմ, ավելի շուտ քաղաքապետը անձամբ կգա կոյուղագիծը մաքրելու, քան ես համբերատար կսպասեմ: Խոստանում եմ՝ նա կգա մաքրելու և այդ աշխատանքները վերահսկելու»,- եզրափակեց նա:

Նշենք, որ այն արվեստանոցը, որը հիմա ամբողջությամբ կոյուղաջրերի մեջ է, հայտնի նկարիչ Արշավիր Կիրակոսյանի (Արշո) արվեստանոցն է, որը մեծ ավանդ ունի հայկական մշակույթի ոլորտում:

Զվարթ Պետրոսյան