««Նորք-Մարաշ» ԲԿ-ի սրտաբանը երեխայիս քաշքշել, ծեծել է»․ միջադեպով զբաղվում են իրավապահները
ՀասարակությունՖեյսբուքյան օգտատեր Մանե Ռաֆայելյանն ահազանգում է, որ «Նորք-Մարաշ» հիվանդանոցի մանկական սրտաբան Կարեն Կուրդովը ծեծել է իր երեխային։ Նա, մասնավորապես, գրել է․ «Երեկ ինձ հետ մի դեպք է պատահել, մինչև հիմա շոկի մեջ եմ ու ով լսում է դրա մասին, նույնպես շոկի մեջ է ընկնում։ 4 տարեկան երեխայիս տանում ենք «Նորք-Մարաշ» սրտաբանական հիվանդանոց` սրտի «ЭХО»-ի։ Այդ բժիշկ կոչվածը՝ (մանկական բժիշկ) Կարեն Կուրդով անուն-ազգանունով, իմ երեխուն նենց ա ծեծել, որ մինչև հիմա տեղը մնացել է երեսի վրա։ Ու դա արեց երեխայիս վրա գոռալուց ու քաշքշելուց հետո, միայն նրա համար, որ իմ 4 տարեկան երեխան վախեցավ ու չէր ուզում պառկեր։ Ինձ էլ գոռալով ու հպարտ ձայնով ասեց, որ գնամ բոլորին ասեմ, որ իրեն չլսող երեխաների հետ ինքը սենցա վարվում:
Եթե կան մարդիկ, ովքեր առնչվել են իրա հետ, խնդրում եմ գրեք ինձ, չթողնենք, որ մյուս երեխաների հետ նույն կերպ վարվի»,- գրել է երեխայի մայրը։
ԼՈՒՐԵՐ․com-ը միջադեպի վերաբերյալ փորձեց մեկնաբանություն ստանալ նաև «Նորք-Մարաշ» ԲԿ-ի մանկական սրտաբան Կարեն Կուրդովից, սակայն հիվանդանոցի մամուլի խոսնակ Ելենա Սիմոնյանը փոխանցեց, որ այս պահին բժշկի հետ կապ հաստատել հնարավոր չէ։ Պարզաբանելով միջադեպը՝ մամուլի խոսնակը նշեց, որ երեխան հետազոտվելու ընթացքում անկարգություն է արել, անկառավարելի է եղել նույնիսկ մոր ներկայությամբ և բժիշկն իր մասնագիտական պարտքը մինչև վերջ կատարելու նպատակով երեխային փորձել է սաստել․ «Ցավոք, այդ ամենը հատուկ մեկնաբանություն է ստացել: Բարձր մակարդակի բժշկի մասին նման բաներ գրելն ու արտահայտվելը, չեմ կարծում՝ ճիշտ արարք է: Մենք, իհարկե, դատապարտում ենք, և չենք արդարացնում միջադեպը, որովհետև անընդունելի է նման արարքն անգամ սաստելու համար»,- նշեց Սիմոնյանը:
Նրա խոսքով՝ ֆինանսական գծով փոխտնօրեն Հրայր Հակոբյանը, որը ժամանակավորապես փոխարինում է ԲԿ-ի տնօրենին, վարչական տույժ է կիրառել տվյալ բժշկի նկատմամբ:
«Միջադեպի հետ կապված զբաղվում են իրավապահ մարմինները։ Նախաքննություն է ընթանում։ Բժիշկ Կուրդովը ևս ձեզ նույն պատասխանն էր տալու»,- ասաց նա։
Մեզ հետ զրույցում ԶԼՄ-ների հետ կապի լրատվության և վերլուծության բաժնի պետ Զարզանդ Գաբրիելյանն էլ փոխանցեց, որ մարտի 18-ին, ժամը 17։03-ին, նշված բովանդակությամբ հաղորդում ոստիկանության Կենտրոնական բաժնում ստացվել է, նյութեր են նախապատրաստվում։
Սոնա Հարությունյան